2014-12-19

ਐਂਡਰਾਇਡ ’ਚ ਐਪ ਇੰਸਟਾਲ ਕਰਨਾ (20141219)

ਐਂਡਰਾਇਡ ਫੋਨ ’ਚ ਐਪ ਇੰਸਟਾਲ ਕਰਨ ਦੇ ਕਈ ਤਰੀਕੇ ਹਨ। ਆਮ ਤੌਰ ’ਤੇ ਇਨ੍ਹਾਂ ਵਿੱਚੋਂ ਤਿੰਨ ਤਰੀਕੇ ਗੂਗਲ ਪਲੇਅ ਸਟੋਰ, ਵੈੱਬਸਾਈਟ ਜਾਂ ਈ-ਮੇਲ ਅਟੈਚਮੈਂਟ ਅਤੇ ਐੱਸਡੀ ਕਾਰਡ ਵਧੇਰੇ ਪ੍ਰਚਲਿਤ ਹਨ:
ਗੂਗਲ ਪਲੇਅ ਸਟੋਰ
ਐਂਡਰਾਇਡ ਐਪਸ ਦੇ ਆਨ-ਲਾਈਨ ਖ਼ਜ਼ਾਨੇ ਨੂੰ ਗੂਗਲ ਪਲੇਅ ਸਟੋਰ ਜਾਂ ਗੂਗਲ ਐਪ ਸਟੋਰ ਕਿਹਾ ਜਾਂਦਾ ਹੈ। ਗੂਗਲ ਪਲੇਅ ਸਟੋਰ ਤੋਂ ਐਪ ਸਰਚ ਕਰਨ ਲਈ ਇੰਟਰਨੈੱਟ ਦਾ ਚਾਲੂ ਹੋਣਾ ਬਹੁਤ ਜ਼ਰੂਰੀ ਹੈ। ਐਪ ਦੀ ਚੋਣ ਕਰਨ ਉਪਰੰਤ ਡਾਊਨਲੋਡ ਦੀ ਆਪਸ਼ਨ ਲਈ ਜਾਂਦੀ ਹੈ। ਇਸ ਉਪਰੰਤ ਰਨ/ਇੰਸਟਾਲ ਆਪਸ਼ਨ ਰਾਹੀਂ ਐਪ ਨੂੰ ਸਿੱਧਾ ਇੰਸਟਾਲ ਕੀਤਾ ਜਾ ਸਕਦਾ ਹੈ।
ਵੈੱਬਸਾਈਟ ਜਾਂ ਈ-ਮੇਲ ਅਟੈਚਮੈਂਟ
ਵਰਤੋਂਕਾਰ ਕਿਸੇ ਵੈੱਬਸਾਈਟ ਜਾਂ ਈ-ਮੇਲ ਅਟੈਚਮੈਂਟ ਤੋਂ ਵੀ ਐਂਡਰਾਇਡ ਐਪ ਇੰਸਟਾਲ ਕਰ ਸਕਦਾ ਹੈ। ਇਨ੍ਹਾਂ ਸਰੋਤਾਂ ਤੋਂ ਡਾਊਨਲੋਡ ਕੀਤੀ ਐਪ ਮੋਬਾਈਲ ਦੀ ਇੰਟਰਨਲ ਮੈਮਰੀ (ਐੱਸਡੀ ਕਾਰਡ) ਦੇ ‘ਡਾਊਨਲੋਡ’ ਵਾਲੇ ਫੋਲਡਰ ਵਿੱਚ ਸੇਵ ਹੋ ਜਾਂਦੀ ਹੈ।
‘ਫਾਈਲ ਮੈਨੇਜਰ’ ਰਾਹੀਂ ਇੰਟਰਨਲ ਐੱਸਡੀ ਕਾਰਡ ਨੂੰ ਖੋਲ੍ਹ ਕੇ ‘ਡਾਊਨਲੋਡ’ ਵਾਲੇ ਫੋਲਡਰ ਤਕ ਪਹੁੰਚਿਆ ਜਾ ਸਕਦਾ ਹੈ। ਇੱਥੋਂ ਲੋੜੀਂਦੀ ਏਪੀਕੇ (ਐਂਡਰਾਇਡ ਐਪ ਫਾਈਲ) ਦੀ ਚੋਣ ਕਰਕੇ ਇੰਸਟਾਲ ਕਰ ਲਓ।
ਐੱਸਡੀ ਕਾਰਡ ਰਾਹੀਂ
ਪਰੰਪਰਾਗਤ ਤਰੀਕੇ ਅਰਥਾਤ ਐੱਸਡੀ ਕਾਰਡ ਰਾਹੀਂ ਐਪ ਨੂੰ ਇੰਸਟਾਲ ਕੀਤਾ ਜਾ ਸਕਦਾ ਹੈ। ਅਜਿਹਾ ਕਰਨ ਲਈ ਪਹਿਲਾਂ ਆਪਣੇ ਮੋਬਾਈਲ ਨੂੰ ਯੂਐੱਸਬੀ ਕੇਬਲ ਰਾਹੀਂ ਕੰਪਿਊਟਰ ਨਾਲ ਜੋੜੋ। ਕੰਪਿਊਟਰ ਵਿੱਚ ਮੋਬਾਈਲ  ਦਾ ਐੱਸਡੀ ਕਾਰਡ (ਅੰਦਰੂਨੀ ਜਾਂ ਬਾਹਰੀ) ਖੋਲ੍ਹੋ ਅਤੇ ਉਸ ਵਿੱਚ ਐਪ ਕਾਪੀ ਕਰੋ। ਹੁਣ ਫਾਈਲ ਮੈਨੇਜਰ ਰਾਹੀਂ ਐਪ ਤਕ ਪਹੁੰਚ ਕੇ ਇਸ ਨੂੰ ਇੰਸਟਾਲ ਕਰ ਲਓ।
ਧਿਆਨ ਰੱਖੋ ਕਿ ਗੂਗਲ ਪਲੇਅ ਸਟੋਰ ਤੋਂ ਬਾਹਰਲੀਆਂ ਐਪ ਇੰਸਟਾਲ ਕਰਨ ਸਮੇਂ ਤੁਹਾਨੂੰ ਸੈਟਿੰਗ ’ਚ ਜਾਹ ਕੇ ਸਕਿਉਰਿਟੀ ਹਟਾਉਣੀ ਪਵੇਗੀ।
ਐਪਸ ਨੂੰ ਡਾਊਨਲੋਡ ਅਤੇ ਇੰਸਟਾਲ ਕਰਨ ਲਈ ਡਰੌਪ ਬਾਕਸ ਦੀ ਵਰਤੋਂ ਵੀ ਲਾਹੇਵੰਦ ਮੰਨੀ ਜਾਂਦੀ ਹੈ। ਐਪਸ ਨੂੰ ਸੌਖੇ ਤਰੀਕੇ ਰਾਹੀਂ ਇੰਸਟਾਲ ਅਤੇ ਬ੍ਰਾਊਜ਼ ਕਰਨ ਲਈ ਏਪੀਕੇ ਇੰਸਟਾਲਰ ਅਤੇ ਕਿਸੇ ਐਪ ਮੈਨੇਜਰ ਪ੍ਰੋਗਰਾਮ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ।

ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਅਤ ਵਰਤੋਂ-11 (20141214)

ਕੀ ਤੁਸੀਂ ਕਿਸੇ ਸਾਈਬਰ ਅਪਰਾਧ ਦਾ ਸ਼ਿਕਾਰ ਹੋ?
ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਆ ਲਈ ਸਾਂਝੇ ਕੀਤੇ ਨੁਸਿਖ਼ਆਂ ਨੂੰ ਧਿਆਨ 'ਚ ਰੱਖਿਆ ਜਾਵੇ ਤਾਂ ਕਾਫ਼ੀ ਹੱਦ ਤੱਕ ਇਨ੍ਹਾਂ ਅਪਰਾਧਾਂ ਤੋਂ ਬਚਿਆ ਜਾ ਸਕਦਾ ਹੈ | ਫਿਰ ਵੀ ਜੇਕਰ ਤੁਸੀਂ ਕਿਸੇ ਸਾਈਬਰ ਅਪਰਾਧ ਦਾ ਸ਼ਿਕਾਰ ਹੋ ਤਾਂ ਸਾਈਬਰ ਪੁਲਿਸ ਸਟੇਸ਼ਨ 'ਤੇ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹੋ |
ਭਾਰਤ ਵਿਚ ਕਈ ਸਾਈਬਰ ਪੁਲਿਸ ਸਟੇਸ਼ਨਾਂ ਦੀ ਸਥਾਪਨਾ ਕੀਤੀ ਗਈ ਹੈ | ਪੰਜਾਬ ਸਰਕਾਰ ਨੇ 4 ਅਪ੍ਰੈਲ, 2011 ਨੂੰ ਮੁਹਾਲੀ ਦੇ ਫ਼ੇਜ਼ 4 ਵਿਚ ਆਧੁਨਿਕ ਸਾਈਬਰ ਪੁਲਿਸ ਸਟੇਸ਼ਨ ਸਥਾਪਿਤ ਕੀਤਾ ਹੈ | ਇਹ ਪੁਲਿਸ ਸਟੇਸ਼ਨ ਨਿਰੰਤਰ ਕਾਰਜ ਕਰ ਰਿਹਾ ਹੈ ਤੇ ਹੁਣ ਤੱਕ ਹਜ਼ਾਰਾਂ ਕੇਸਾਂ ਦੀ ਗੁੱਥੀ ਨੂੰ ਸੁਲਝਾ ਚੁੱਕਾ ਹੈ |
ਅੰਕੜਾ ਚੋਰੀ, ਹੈਕਿੰਗ, ਵਾਇਰਸ ਹਮਲਾ, ਵੈੱਬ ਅਸ਼ਲੀਲਤਾ, ਈ-ਮੇਲ ਠੱਗੀ, ਨੈੱਟ ਲਾਟਰੀ, ਕਰੈਡਿਟ ਕਾਰਡ ਧੋਖੇਬਾਜ਼ੀ, ਫੇਸਬੁਕ ਅਤੇ ਸਾਈਬਰ ਸਟੈਕਿੰਗ (ਵੈੱਬ 'ਤੇ ਪਿੱਛਾ ਕਰਨਾ) ਨਾਲ ਸਬੰਧਿਤ ਅਪਰਾਧਾਂ ਬਾਰੇ ਜਾਣਕਾਰੀ ਡਿਪਟੀ ਇੰਸਪੈਕਟਰ ਜਨਰਲ ਆਫ਼ ਪੁਲਿਸ (ਏਡੀਜੀਪੀ), ਪੰਜਾਬ ਸਟੇਟ ਸਾਈਬਰ ਇਨਵੈਸਟੀਗੇਸ਼ਨ ਸੈੱਲ, ਫ਼ੇਜ਼-4, ਐੱਸਏਐੱਸ ਨਗਰ, ਮੁਹਾਲੀ ਦੇ ਪਤੇ 'ਤੇ ਦਿੱਤੀ ਜਾ ਸਕਦੀ ਹੈ | ਸਾਈਬਰ ਅਪਰਾਧਾਂ ਬਾਰੇ ਸੂਚਨਾ ਦੇਣ ਲਈ ਪੰਜਾਬ ਪੁਲਿਸ ਦੀ ਵੈੱਬਸਾਈਟ www.punjabpolice.gov.in ਜਾਂ www.kunwar.net ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ | ਈ-ਮੇਲ ਪਤੇ ssp.cyber-pb0nic.in ਜਾਂ adgp.crime.police0punjab.goc.in ਉੱਤੇ ਵੀ ਸ਼ਿਕਾਇਤ ਦਰਜ ਕਰਵਾਈ ਜਾ ਸਕਦੀ ਹੈ |
ਹਰ ਰੋਜ਼ ਹਜ਼ਾਰਾਂ ਕੰਪਿਊਟਰ ਅਤੇ ਕੰਪਿਊਟਰੀ ਨੈੱਟਵਰਕ ਸਾਈਬਰ ਅਪਰਾਧੀਆਂ ਦੀ ਗਿ੍ਫ਼ਤ 'ਚ ਆ ਰਹੇ ਹਨ | ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਅਤ ਵਰਤੋਂ ਰਾਹੀਂ ਅਜਿਹੇ ਅਪਰਾਧਾਂ ਨੂੰ ਕਾਫ਼ੀ ਹੱਦ ਤੱਕ ਠੱਲਿ੍ਹਆ ਜਾ ਸਕਦਾ ਹੈ |
ਜੇ ਭਾਰਤੀ ਵਰਤੋਂਕਾਰ ਸਾਫਟਵੇਅਰਾਂ ਨੂੰ ਖ਼ਰੀਦ ਕੇ ਵਰਤਣ ਦੀ ਆਦਤ ਪਾਉਣ ਅਤੇ ਚੰਗੇ ਐਾਟੀਵਾਇਰਸ ਦਾ ਪ੍ਰਬੰਧ ਕਰਨ ਤਾਂ ਅਜਿਹੇ ਖ਼ਤਰਿਆਂ ਤੋਂ ਨਿਜਾਤ ਪਾਈ ਜਾ ਸਕਦੀ ਹੈ | ਇਸੇ ਤਰ੍ਹਾਂ ਵੈੱਬ ਬ੍ਰਾਊਜ਼ਰਾਂ ਵਿਚ ਮੌਜੂਦ ਸੁਰੱਖਿਆ ਨੁਸਿਖ਼ਆਂ ਦੀ ਵਰਤੋਂ, ਫਾਇਰ ਵਾਲ ਦੀ ਵਰਤੋਂ, ਫ਼ਾਲਤੂ ਈ-ਮੇਲ ਸੰਦੇਸ਼ਾਂ ਦੇ ਝੰਜਟ 'ਚ ਦਿਲਚਸਪੀ ਘਟਾਉਣ, ਸੁਰੱਖਿਅਤ ਪਾਸਵਰਡ ਰੱਖਣ, ਸਿਰਫ਼ ਤਸੱਲੀਬਖ਼ਸ਼ ਠਿਕਾਣਿਆਂ ਤੋਂ ਹੀ ਡਾਊਨਲੋਡ ਕਰਨ, ਸਾਫਟਵੇਅਰਾਂ ਨੂੰ ਬਕਾਇਦਾ ਅੱਪਡੇਟ ਕਰਦੇ ਰਹਿਣ, ਨੈੱਟ ਬੈਂਕਿੰਗ ਅਤੇ ਆਨਲਾਈਨ ਸ਼ਾਪਿੰਗ ਸਮੇਂ ਸਾਵਧਾਨੀ ਵਰਤਣ ਨਾਲ ਸਾਈਬਰ ਅਪਰਾਧਾਂ ਦੇ ਖ਼ੌਫ਼ ਤੋਂ ਬਚਿਆ ਜਾ ਸਕਦਾ ਹੈ | ਫ਼ਾਲਤੂ ਈ-ਮੇਲ ਸੰਦੇਸ਼ਾਂ, ਸਮਾਜ ਨੂੰ ਕੁਰਾਹੇ ਪਾਉਣ ਵਾਲੀਆਂ ਵੈੱਬਸਾਈਟਾਂ, ਵਾਇਰਸ ਫੈਲਾਉਣ ਵਾਲੇ ਠਿਕਾਣਿਆਂ, ਸਾਈਬਰ ਠੱਗਾਂ, ਫੇਸਬੁਕ ਅਤੇ ਹੋਰਨਾਂ ਸੋਸ਼ਲ ਮੀਡੀਆ ਵੈੱਬਸਾਈਟਾਂ 'ਤੇ ਭੜਕਾਊ ਤੇ ਦੂਜਿਆਂ ਨੂੰ ਜ਼ਲੀਲ ਕਰਨ ਵਾਲੀਆਂ ਪੋਸਟਾਂ ਬਾਰੇ ਸਾਈਬਰ ਥਾਣਿਆਂ 'ਚ ਸ਼ਿਕਾਇਤਾਂ ਦਰਜ ਕਰਵਾਉਣ ਨਾਲ ਵੀ ਇਸ 'ਤੇ ਨਕੇਲ ਕੱਸੀ ਜਾ ਸਕਦੀ ਹੈ |
ਸਾਈਬਰ ਸੰਸਾਰ ਦਾ ਇਹ ਇਕ ਗੰਭੀਰ ਅਤੇ ਖ਼ੌਫ਼ਨਾਕ ਪਹਿਲੂ ਹੈ | ਇਸ ਨਾਲ ਕੰਪਿਊਟਰ ਦੀ ਉਸਾਰੂ ਕੰਮਾਂ ਲਈ ਵਰਤੋਂ ਕਰਨ ਵਾਲਿਆਂ ਵਿਚ ਭੈਅ ਪੈਦਾ ਹੋਇਆ ਹੈ | ਸਾਨੂੰ ਵਿਗਿਆਨ ਦੇ ਇਸ ਅਨਮੋਲ ਤੋਹਫ਼ੇ ਦੀ ਸਾਰਥਿਕ ਵਰਤੋਂ ਕਰਕੇ ਪੂਰਾ ਲਾਹਾ ਲੈਣਾ ਚਾਹੀਦਾ ਹੈ |

ਅੰਗਰੇਜ਼ੀ ਪੰਜਾਬੀ ਕੋਸ਼ (20141212)

ਅੰਗਰੇਜ਼ੀ ਪੰਜਾਬੀ ਕੋਸ਼ ਮੋਬਾਈਲ ਦੀ ਇੱਕ ਮਹੱਤਵਪੂਰਨ ਐਪ ਹੈ। ਇਹ ਪੰਜਾਬੀ ਯੂਨੀਵਰਸਿਟੀ ਦੇ ਭਾਸ਼ਾ ਵਿਗਿਆਨ ਅਤੇ ਪੰਜਾਬੀ ਕੋਸ਼ਕਾਰੀ ਵਿਭਾਗ ਵੱਲੋਂ ਪ੍ਰਕਾਸ਼ਿਤ ਕੋਸ਼ ਦਾ ਮੋਬਾਈਲ ਸੰਸਕਰਨ ਹੈ। ਇਸ ਨੂੰ ਵੈੱਬਸਾਈਟ
www.punjabicomputer.com ਤੋਂ ਡਾਊਨਲੋਡ ਕੀਤਾ ਜਾ ਸਕਦਾ ਹੈ। ਇਸ ਵਿੱਚ ਕਰੀਬ 32,000 ਸ਼ਬਦ ਮੌਜੂਦ ਹਨ। ਐਪ ਵਿੱਚ ਅੰਗਰੇਜ਼ੀ ਦੇ ਸ਼ਬਦ ਪਾਉਣੇ ਬੇਹੱਦ ਆਸਾਨ ਹਨ। ਕਿਸੇ ਸ਼ਬਦ ਦੇ ਪਹਿਲੇ ਕੁਝ ਅੱਖਰ ਟਾਈਪ ਕਰਨ ਉਪਰੰਤ ਹੇਠਾਂ ਨੂੰ ਸ਼ਬਦ ਸੂਚੀ ਖੁੱਲ੍ਹ ਜਾਂਦੀ ਹੈ। ਵਰਤੋਂਕਾਰ ਪੂਰਾ ਸ਼ਬਦ ਟਾਈਪ ਕਰਨ ਦੀ ਥਾਂ ’ਤੇ ਸੂਚੀ ਵਿੱਚੋਂ ਸ਼ਬਦ ਦੀ ਚੋਣ ਕਰ ਸਕਦਾ ਹੈ। ਕੋਸ਼ ਵਿੱਚੋਂ ਸ਼ਬਦ ਸਰਚ ਕਰਨ ਉਪਰੰਤ ਅੰਗਰੇਜ਼ੀ ਸ਼ਬਦ ਦਾ ਉਚਾਰਨ, ਵਿਆਕਰਣਕ ਜਾਣਕਾਰੀ ਅਤੇ ਪੰਜਾਬੀ ਅਰਥ ਪੜ੍ਹੇ ਜਾ ਸਕਦੇ ਹਨ।

2014-12-08

ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਅਤ ਵਰਤੋਂ-10 (2014-12-07)

ਇਧਰ ਵੀ ਧਿਆਨ ਦਿਓ

ਕੰਪਿਊਟਰ ਦਾ ਪ੍ਰਯੋਗ ਕਰਨਾ ਹਰੇਕ ਨੂੰ ਆਉਂਦਾ ਹੈ ਪਰ ਇਸ ਦਾ ਸਾਵਧਾਨੀ ਜਾਂ ਸੁਰੱਖਿਆ ਨਾਲ ਪ੍ਰਯੋਗ ਕਰਨਾ ਕਿਸੇ-ਕਿਸੇ ਨੂੰ ਆਉਂਦਾ ਹੈ | ਕਈ ਲੋਕ ਕੰਪਿਊਟਰ ਦੀ ਸਾਫ਼-ਸਫ਼ਾਈ ਨਹੀਂ ਕਰਦੇ ਅਤੇ ਕੰਮ ਕਰਨ ਲਈ ਸਹੀ ਮੇਜ਼-ਕੁਰਸੀ ਦਾ ਇਸਤੇਮਾਲ ਨਹੀਂ ਕਰਦੇ | ਇਸ ਨਾਲ ਉਨ੍ਹਾਂ ਦੇ ਕੰਪਿਊਟਰ ਵਿਚ ਖ਼ਰਾਬੀ ਆ ਸਕਦੀ ਹੈ ਤੇ ਉਨ੍ਹਾਂ ਦੀ ਸਿਹਤ ਵਿਚ ਕਈ ਤਰ੍ਹਾਂ ਦੇ ਵਿਕਾਰ ਪੈਦਾ ਹੋ ਸਕਦੇ ਹਨ | ਕੰਪਿਊਟਰ ਦੀ ਸੁਚੱਜੀ ਵਰਤੋਂ ਲਈ ਹੇਠਾਂ ਲਿਖੀਆਂ ਸਾਵਧਾਨੀਆਂ ਵਰਤਣੀਆਂ ਚਾਹੀਦੀਆਂ ਹਨ: 

  • ਕੰਪਿਊਟਰ ਵਾਲਾ ਕਮਰਾ ਸਾਫ਼-ਸੁਥਰਾ, ਹਵਾਦਾਰ, ਮਿੱਟੀ-ਘੱਟੇ, ਸਲ੍ਹਾਬ ਅਤੇ ਸਿੱਧੀ ਸੂਰਜੀ ਰੌਸ਼ਨੀ ਤੋਂ ਮੁਕਤ ਹੋਣਾ ਚਾਹੀਦਾ ਹੈ |
  • ਕੰਪਿਊਟਰ ਦੀ ਬਾਹਰਲੀ ਸਫ਼ਾਈ ਦੇ ਨਾਲ-ਨਾਲ ਸੀਪੀਯੂ ਦੀ ਕੈਬਨਿਟ ਨੂੰ ਖੋਲ੍ਹ ਕੇ ਅੰਦਰੂਨੀ ਸਫ਼ਾਈ ਵੀ ਕਰਦੇ ਰਹਿਣਾ ਚਾਹੀਦਾ ਹੈ |
  • ਕੀ-ਬੋਰਡ ਨੂੰ ਸਾਫ਼ਟ ਬੁਰਸ਼ ਨਾਲ ਸਾਫ਼ ਕਰੋ |
  • ਮੌਨੀਟਰ ਨੂੰ ਸਾਫ਼ ਕਰਨ ਲਈ ਵਿਸ਼ੇਸ਼ ਕਿਸਮ ਦੀ ਸਪਰੇਅ ਦਾ ਇਸਤੇਮਾਲ ਕੀਤਾ ਜਾ ਸਕਦਾ ਹੈ |
  • ਕੰਪਿਊਟਰ ਜਾਂ ਲੈਪਟਾਪ ਨੂੰ ਇੱਧਰ-ਉੱਧਰ ਲੈ ਜਾਣ ਸਮੇਂ ਝਟਕੇ ਤੋਂ ਬਚਾਅ ਕੇ ਰੱਖੋ, ਕਿਉਂਕਿ ਕੰਪਿਊਟਰ ਦੀ ਹਾਰਡ ਡਿਸਕ ਛੋਟੇ ਜਿਹੇ ਝਟਕੇ ਨਾਲ ਵੀ ਖ਼ਰਾਬ ਹੋ ਸਕਦੀ ਹੈ ਤੇ ਇਸ ਵਿਚ ਬੈਡ ਸੈਕਟਰ ਆ ਸਕਦੇ ਹਨ |
  • ਪੈੱਨ ਡਰਾਈਵ ਦੀ ਘੱਟ ਤੋਂ ਘੱਟ ਵਰਤੋਂ ਕਰੋ | ਇਸ ਨੂੰ ਪਰਮਾਨੈਂਟ ਸਟੋਰੇਜ਼ ਵਜੋਂ ਨਾ ਵਰਤੋਂ | ਇਹ ਇਕ ਕੰਪਿਊਟਰ ਤੋਂ ਦੂਜੇ ਕੰਪਿਊਟਰ ਤੱਕ ਡਾਟਾ ਸਥਾਨਾਂਤਰਨ ਦਾ ਸਾਧਨ ਹੈ | ਇਸ ਨੂੰ ਸਮੇਂ-ਸਮੇਂ 'ਤੇ ਫਾਰਮੈਟ (ਸਾਫ਼) ਕਰਦੇ ਰਹੋ | ਕੰਪਿਊਟਰ ਦੀ ਸੁਰੱਖਿਆ ਲਈ ਪੈੱਨ ਡਰਾਈਵ ਖੋਲ੍ਹਣ ਲਈ ਪਾਸਵਰਡ ਵੀ ਲਗਾਇਆ ਜਾ ਸਕਦਾ ਹੈ |
  • ਜੇਕਰ ਕੰਪਿਊਟਰ ਦੀ ਰਫ਼ਤਾਰ ਮੱਧਮ ਪੈ ਜਾਵੇ ਤਾਂ ਰੀਸਾਈਕਲ ਬਿਨ ਵਿਚਲੀਆਂ ਫਾਈਲਾਂ ਡਿਲੀਟ ਕਰ ਦਿਓ | ਡੈਸਕਟਾਪ 'ਤੇ ਫਾਈਲਾਂ ਨੂੰ ਕਿਸੇ ਡਰਾਈਵ 'ਚ ਸੇਵ ਕਰ ਲਓ | ਟੈਂਪਰੇਰੀ (ਆਰਜ਼ੀ) ਫਾਈਲਾਂ ਅਤੇ ਫ਼ਾਲਤੂ ਸਾਫਟਵੇਅਰਾਂ ਨੂੰ ਸਮੇਂ-ਸਮੇਂ ਹਟਾਉਂਦੇ ਰਹੋ | 
  • ਪਿ੍ੰਟਰ ਵਿਚ ਸਾਫ਼-ਸੁਥਰਾ ਤੇ ਖ਼ੁਸ਼ਕ ਕਾਗ਼ਜ਼ ਵਰਤੋ | ਰਫ਼ ਅਤੇ ਸਲ੍ਹਾਬ ਵਾਲਾ ਕਾਗ਼ਜ਼ ਵਰਤਣ ਨਾਲ ਪਿ੍ੰਟ ਹੈੱਡ ਅਤੇ ਰੋਲਰ 'ਤੇ ਮਾੜਾ ਅਸਰ ਪੈਂਦਾ ਹੈ |
  • ਕੰਪਿਊਟਰ ਦੀ ਸੁਰੱਖਿਆ ਲਈ ਪਾਵਰ-ਆਨ ਅਤੇ ਸਕਰੀਨ ਸੇਵਰ ਪਾਸਵਰਡ ਦੀ ਵਰਤੋਂ ਯਕੀਨੀ ਬਣਾਓ |
  • ਡਾਟਾ, ਹਾਰਡਵੇਅਰ ਅਤੇ ਵਿੰਡੋਜ਼ ਦੀ ਸੁਰੱਖਿਆ ਲਈ ਯੂਪੀਐੱਸ ਦਾ ਇਸਤੇਮਾਲ ਜ਼ਰੂਰ ਕਰੋ | ਅੱਜਕੱਲ੍ਹ ਬਾਜ਼ਾਰ 'ਚ ਯੂਪੀਐੱਸ ਦੀ ਸੁਵਿਧਾ ਵਾਲੇ ਇਨਵਰਟਰ ਵੀ ਉਪਲਬਧ ਹਨ |
  • ਉਚਿੱਤ ਆਕਾਰ ਅਤੇ ਉਚਾਈ ਵਾਲੇ ਮੇਜ਼-ਕੁਰਸੀ ਦੀ ਵਰਤੋਂ ਕਰੋ | ਮੇਜ਼ ਜਾਂ ਕੀ-ਬੋਰਡ ਰੱਖਣ ਵਾਲੀ ਦਰਾਜ਼ ਦੀ ਉਚਾਈ ਤੁਹਾਡੀਆਂ ਕੂਹਣੀਆਂ ਦੇ ਬਰਾਬਰ ਹੋਣੀ ਚਾਹੀਦੀ ਹੈ | ਮੌਨੀਟਰ ਤੁਹਾਡੀਆਂ ਅੱਖਾਂ ਦੀ ਸੇਧ 'ਚ ਘੱਟੋ-ਘੱਟ 2 ਫੁੱਟ ਦੀ ਦੂਰੀ 'ਤੇ ਹੋਵੇ |
  • ਬਲਬ, ਟਿਊਬ ਆਦਿ ਪ੍ਰਕਾਸ਼ ਸਰੋਤ ਮੌਨੀਟਰ ਦੀ ਸਕਰੀਨ ਦੇ ਸਾਹਮਣੇ ਨਹੀਂ ਹੋਣਾ ਚਾਹੀਦਾ | ਅਜਿਹੀ ਸਥਿਤੀ ਵਿਚ ਪ੍ਰਕਾਸ਼ ਸਰੋਤ ਦਾ ਪ੍ਰਕਾਸ਼ ਮੌਨੀਟਰ ਦੀ ਸਕਰੀਨ ਨਾਲ ਪਰਿਵਰਤਿਤ ਹੋ ਕੇ ਤੁਹਾਡੀਆਂ ਅੱਖਾਂ 'ਤੇ ਮਾੜਾ ਅਸਰ ਕਰ ਸਕਦਾ ਹੈ | ਕੋਸ਼ਿਸ਼ ਕਰੋ ਕਿ ਲੈਂਪ, ਟਿਊਬ ਆਦਿ ਤੁਹਾਡੇ ਖੱਬੇ ਹੱਥ ਹੋਵੇ |
  • ਕੰਪਿਊਟਰ ਦੀ ਲਗਾਤਾਰ ਵਰਤੋਂ ਨਹੀਂ ਕਰਨੀ ਚਾਹੀਦੀ | ਵਿੱਚੋਂ-ਵਿੱਚੋਂ ਬੈਠਕ ਬਦਲਦੇ ਰਹਿਣਾ ਚਾਹੀਦਾ ਹੈ | ਕੰਪਿਊਟਰ ਦੀ ਲਗਾਤਾਰ ਲੰਬੇ ਸਮੇਂ ਤੱਕ ਵਰਤੋਂ ਕਰਨ ਨਾਲ ਅੱਖਾਂ, ਹਥੇਲੀਆਂ, ਗਰਦਨ, ਉਂਗਲਾਂ, ਪਿੱਠ ਅਤੇ ਦਿਮਾਗ਼ 'ਤੇ ਮਾੜਾ ਅਸਰ ਹੋ ਸਕਦਾ ਹੈ | ਗਰਦਨ ਵਿਚ ਅਕੜਾਹਟ, ਸਰਵਾਈਕਲ, ਹਥੇਲੀਆਂ 'ਚ ਸੋਜ਼ਸ਼ ਅਤੇ ਮਾਨਸਿਕ ਬੋਝ ਕੰਪਿਊਟਰ ਦੀ ਵੱਧ ਵਰਤੋਂ ਦਾ ਸਿੱਟਾ ਹਨ |

ਗੂਗਲ 'ਤੇ ਖਾਤਾ ਖੋਲ੍ਹ ਕੇ ਮਾਣੋ ਬਿਹਤਰੀਨ ਸੁਵਿਧਾਵਾਂ (2014-12-05)

ਗੂਗਲ ਐਪ ਸਟੋਰ, ਗੂਗਲ ਪਲੱਸ, ਜੀ-ਮੇਲ, ਗੂਗਲ ਸਰਚ, ਯੂ-ਟਿਊਬ, ਬੈਕ-ਅਪ ਅਤੇ ਰੀਸੈੱਟ ਆਦਿ ਸੁਵਿਧਾਵਾਂ ਮਾਣਨ ਲਈ ਗੂਗਲ ’ਤੇ ਖਾਤਾ ਖੋਲ੍ਹਣ ਦੀ ਜ਼ਰੂਰਤ ਪੈਂਦੀ ਹੈ। ਖਾਤਾ ਖੋਲ੍ਹਣ ਲਈ ਵੇਰਵਾ ਇਸ ਪ੍ਰਕਾਰ ਹੈ:

  • ਮੋਬਾਈਲ ਦੇ ‘ਸੈਟਿੰਗਜ਼’ ਮੀਨੂੰ ਵਿੱਚ ਜਾਓ।
  • ‘ਅਕਾਊਂਟ’ ਵਾਲੇ ਹਿੱਸੇ ਦੇ ਹੇਠਾਂ ‘ਐਡ ਅਕਾਊਂਟ’ ਉੱਤੇ ਕਲਿੱਕ ਕਰੋ।
  • ਅਕਾਊਂਟ ਸੂਚੀ ਖੁੱਲ੍ਹੇਗੀ। ਇੱਥੋਂ ‘ਗੂਗਲ’ ਦੀ ਚੋਣ ਕਰੋ।
  • ਪੁਰਾਣੇ ਬਣੇ ਹੋਏ ਖਾਤੇ ਨਾਲ ਜੋੜਨ ਜਾਂ ਨਵਾਂ ਖਾਤਾ ਖੋਲ੍ਹਣ ਬਾਰੇ ਦੋ ਵਿਕਲਪ ਸਾਹਮਣੇ ਆਉਣਗੇ। ਦੋਹਾਂ ਵਿੱਚੋਂ ਇੱਕ ਦੀ ਚੋਣ ਕਰੋ।
  • ਢੁਕਵੀਆਂ ਹਦਾਇਤਾਂ ਦਾ ਪਾਲਣ ਕਰਦਿਆਂ ਕੰਮ ਪੂਰਾ ਕਰੋ।

ਗੂਗਲ ’ਤੇ ਅਕਾਊਂਟ ਖੋਲ੍ਹਣ ਦਾ ਫ਼ਾਇਦਾ ਤਦ ਹੀ ਹੈ ਜੇ ਤੁਹਾਡੇ ਮੋਬਾਈਲ ’ਤੇ ਇੰਟਰਨੈੱਟ ਦੀ ਸਹੂਲਤ ਹੋਵੇ। ਜੇ ਤੁਸੀਂ ਨੈੱਟ ਪੈਕ ਪਵਾਇਆ ਹੋਇਆ ਹੈ ਅਤੇ ਗੂਗਲ ’ਤੇ ਖਾਤਾ ਵੀ ਬਣਾਇਆ ਹੋਇਆ ਹੈ ਤਾਂ        ਮੋਬਾਈਲ  ’ਚ ਆਈਆਂ ਕਈ ਸਮੱਸਿਆਵਾਂ ਦਾ ਹੱਲ ਬਾਖ਼ੂਬੀ ਕਰ ਸਕਦੇ ਹੋ। ਮਿਸਾਲ ਵਜੋਂ ਮੋਬਾਈਲ  ਖੋਲ੍ਹਣ ਦਾ ਪਾਸਵਰਡ ਭੁੱਲਣ ਉਪਰੰਤ ਤੁਸੀਂ ਗੂਗਲ ਅਕਾਊਂਟ ਰਾਹੀਂ ਮਦਦ ਲੈ ਸਕਦੇ ਹੋ। ਡਾਟੇ ਦਾ ਬੈਕਅਪ ਲੈ ਸਕਦੇ ਹੋ ਤੇ ਉਸ ਨੂੰ ਰਿਕਵਰ ਵੀ ਕਰ ਸਕਦੇ ਹੋ।

2014-11-30

ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਅਤ ਵਰਤੋਂ-9 (20141130)

ਸਾਫ਼ਟਵੇਅਰ ਚੋਰੀ 
ਮੁੱਲ ਦੇ ਸਾਫਟਵੇਅਰਾਂ ਨੂੰ ਕਰੈਕ ਕਰਕੇ ਗ਼ੈਰ-ਕਾਨੂੰਨੀ ਢੰਗ ਨਾਲ ਵਰਤਣ ਦਾ ਕਾਰਾ ਸਾਈਬਰ ਅਪਰਾਧਾਂ ਦੀ ਸ਼੍ਰੇਣੀ 'ਚ ਆਉਂਦਾ ਹੈ | ਦਿਨੋਂ-ਦਿਨ ਪਾਈਰੇਟਿਡ (ਚੋਰੀ ਦੇ) ਸਾਫਟਵੇਅਰਾਂ ਦੀ
ਵਰਤੋਂ ਵੱਧ ਰਹੀ ਹੈ, ਜਿਸ ਕਾਰਨ ਸਾਫ਼ਟਵੇਅਰ ਵਿਕਾਸਕਾਰਾਂ ਅਤੇ ਆਈਟੀ ਕੰਪਨੀਆਂ ਨੂੰ ਕਰੋੜਾਂ ਰੁਪਏ ਦਾ ਚੂਨਾ ਲੱਗ ਰਿਹਾ ਹੈ | ਇਨ੍ਹਾਂ ਸਾਫਟਵੇਅਰਾਂ ਦੀ ਵਰਤੋਂ ਨਾਲ ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਆ 'ਤੇ ਵੀ ਸਵਾਲੀਆ ਚਿੰਨ੍ਹ ਲੱਗ ਗਿਆ ਹੈ | ਕਈ ਪਾਈਰੇਟਿਡ ਸਾਫ਼ਟਵੇਅਰ ਅਸਲ ਸਾਫ਼ਟਵੇਅਰ ਨਾਲੋਂ ਅਲੱਗ ਕਿਸਮ ਦਾ ਵਰਤਾਓ ਕਰਦੇ ਹਨ, ਜਿਸ ਕਾਰਨ ਇਹ ਕੰਪਿਊਟਰ ਨੂੰ ਨੁਕਸਾਨ ਪਹੁੰਚਾ ਸਕਦੇ ਹਨ | ਇਹ ਕੰਪਿਊਟਰ 'ਚ ਸਾਂਭੀ ਖ਼ੁਫ਼ੀਆ ਜਾਣਕਾਰੀ ਨੂੰ 'ਲੀਕ' ਕਰ ਸਕਦੇ ਹਨ | ਕਰੈਕ ਕੀਤੇ ਪਾਈਰੇਟਿਡ ਸਾਫਟਵੇਅਰਾਂ ਦੇ ਇਸਤੇਮਾਲ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ |

ਚੈਟਿੰਗ ਦਾ ਖ਼ਤਰਨਾਕ ਪਹਿਲੂ 
ਚੈਟਿੰਗ ਇਕ ਤਰ੍ਹਾਂ ਦੀ ਸ਼ਬਦੀ ਚਰਚਾ ਹੈ ਤੇ ਇਸ ਰਾਹੀਂ ਸੁੱਖ-ਸੁਨੇਹੇ ਦਾ ਸੰਚਾਰ ਬੇਹੱਦ ਸਸਤਾ ਪੈਂਦਾ ਹੈ |
ਚੈਟਿੰਗ ਅਰਥਾਤ ਸ਼ਬਦੀ ਚਰਚਾ,
ਫ਼ਾਇਦਾ ਵੱਧ ਤੇ ਘੱਟ ਪੈਂਦਾ ਖਰਚਾ |
ਅਜੋਕੇ ਨੌਜਵਾਨਾਂ ਦੇ ਚੈਟਿੰਗ ਦਾ ਭੂਤ ਸਿਰ ਚੜ੍ਹ ਕੇ ਬੋਲ ਰਿਹਾ ਹੈ | ਕੁਝ ਮੁੰਡੇ-ਕੁੜੀਆਂ ਚੈਟਿੰਗ ਦੀ ਦਲਦਲ ਵਿਚ ਧਸ ਕੇ ਸ਼ਰਮ ਦੀਆਂ ਹੱਦਾਂ ਵੀ ਪਾਰ ਕਰ ਜਾਂਦੇ ਹਨ | ਨਵੀਂ ਪੀੜ੍ਹੀ ਦੇ ਨੌਜਵਾਨਾਂ ਦਾ ਸਮਾਰਟ ਫ਼ੋਨਾਂ ਨਾਲ ਸੰਗਮ ਹੋਣ ਨਾਲ 'ਚੈਟਿੰਗ' ਨਾਂਅ ਦੀ ਬਿਮਾਰੀ ਨੇ ਪੈਰ ਪਸਾਰੇ ਹਨ|
ਚੈਟਿੰਗ ਰਾਹੀਂ ਜਿੱਥੇ ਬਹੁ-ਅਰਥੀ ਤੇ ਅਸੱਭਿਅਕ ਸ਼ਬਦਾਵਲੀ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਉੱਥੇ ਅਪਰਾਧੀਆਂ ਲਈ ਇਹ ਬਹੁਤ ਵੱਡਾ ਹਥਿਆਰ ਮੰਨਿਆ ਜਾਂਦਾ ਹੈ | ਚੈਟਿੰਗ ਦੌਰਾਨ ਅਸੱਭਿਅਕ ਅਤੇ ਫ਼ਿਰਕੂ ਭਾਵਨਾ ਪੈਦਾ ਕਰਨ ਵਾਲੇ ਸ਼ਬਦਾਂ ਤੋਂ ਸੰਕੋਚ ਰੱਖੋ | ਕਿਸੇ ਵਿਅਕਤੀ, ਸੰਸਥਾ, ਧਰਮ, ਜਾਤ ਨਾਲ ਨਿੱਜੀ ਕਿੜ ਕੱਢਣ ਲਈ ਚੈਟਿੰਗ ਦਾ ਇਸਤੇਮਾਲ ਨਾ ਕਰੋ |

ਅਗਿਆਤ ਸਰੋਤ ਦੀਆਂ ਐਪਸ ਬਲੌਕ ਹੋਣ ਦਾ ਮਸਲਾ (20141128)

ਗੂਗਲ ਐਪ ਸਟੋਰ ‘ਤੇ ਹਜ਼ਾਰਾਂ ਐਪਸ ਉਪਲਬਧ ਹਨ। ਇਨ੍ਹਾਂ ਐਪਸ ਨੂੰ ਇੰਟਰਨੈੱਟ ਰਾਹੀਂ ਡਾਊਨਲੋਡ ਕਰਕੇ ਇੰਸਟਾਲ ਕੀਤਾ ਜਾ ਸਕਦਾ ਹੈ। ਐਂਡਰਾਇਡ ਫੋਨ ਕਿਸੇ ਅਗਿਆਤ ਸਰੋਤ ਜਿਵੇਂ ਕਿ ਕਿਸੇ ਵੈੱਬਸਾਈਟ, ਈ-ਮੇਲ ਅਟੈਚਮੈਂਟ, ਐੱਸਡੀ ਕਾਰਡ ਤੋਂ ਐਪ ਇੰਸਟਾਲ ਕਰਨ ਦੀ ਮਨਾਹੀ ਕਰਦਾ ਹੈ। ਜੇ ਅਜਿਹੇ ਸਰੋਤ ਤੋਂ ਕੋਈ ਐਪ ਇੰਸਟਾਲ ਕਰਨੀ ਹੋਵੇ ਤਾਂ ਤੁਹਾਨੂੰ ਇੱਕ ਵਾਰ ਆਪਣੇ ਫੋਨ ਵਿੱਚ ਮਾਮੂਲੀ ਸੈਟਿੰਗ ਕਰਨ ਦੀ ਲੋੜ ਪਵੇਗੀ। ਸੈਟਿੰਗ ਕਰਨ ਲਈ ਨਿਮਨ ਲਿਖਤ ਪੜਾਅ ਅਪਣਾਏ ਜਾ ਸਕਦੇ ਹਨ:

  • ਮੋਬਾਈਲ ਦੀਆਂ ਸੈਟਿੰਗਜ਼ ਖੋਲ੍ਹੋ।
  • ‘ਸਕਿਉਰਿਟੀ’ ਵਿਕਲਪ ਦੀ ਚੋਣ ਕਰੋ।
  •  ਹੁਣ ‘ਅਨ-ਨੋਨ ਸੋਰਸ’ ਦੇ ਚੈੱਕ ਬਕਸੇ ਨੂੰ ਟੱਚ ਕਰਕੇ ਚੈੱਕ ਕਰ ਦਿਓ।
  • ਅਜਿਹਾ ਕਰਨ ਉਪਰੰਤ ਅਗਿਆਤ ਸਰੋਤ ਤੋਂ ਐਪ ਇੰਸਟਾਲ ਹੋ ਜਾਵੇਗੀ ਤੇ ਬਲੌਕ ਹੋਣ ਦਾ ਸੰਦੇਸ਼ ਨਹੀਂ ਆਵੇਗਾ।
  • ਜੇ ਪਹਿਲਾਂ ਤੋਂ ਹੀ ਉਪਰੋਕਤ ਸੈਟਿੰਗ ਨਾ ਕੀਤੀ ਹੋਵੇ ਤਾਂ ਅਜਿਹੀ ਐਪ ਇੰਸਟਾਲ ਕਰਨ ਸਮੇਂ ਸਕਰੀਨ ‘ਤੇ ‘ਇੰਸਟਾਲ ਬਲੌਕਡ’ ਦਾ ਸੰਦੇਸ਼ ਆਵੇਗਾ।
  • ਇੱਥੋਂ ‘ਸੈਟਿੰਗਜ਼’ ‘ਤੇ ਟੱਚ ਕਰਕੇ ਤੁਸੀਂ ਸਿੱਧਾ ‘ਸਕਿਉਰਿਟੀ’ ਵਾਲੇ ਪੰਨੇ ‘ਤੇ ਪਹੁੰਚ ਜਾਵੋਗੇ। ਇੱਥੋਂ ਉੱਪਰ ਦੱਸੇ ਅਨੁਸਾਰ ‘ਅਨ-ਨਾਊਨ ਸੋਰਸ’ ਦੇ ਚੈੱਕ ਬਕਸੇ ਨੂੰ ਇੱਕ ਵਾਰ ਚੈੱਕ ਕਰ ਲਿਆ ਜਾਵੇ।

2014-11-27

ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਅਤ ਵਰਤੋਂ-8 (20141123)

ਸਮਾਜਿਕ ਵੈੱਬਸਾਈਟਾਂ ਦਾ ਮਸਲਾ
ਫੇਸਬੁਕ, ਟਵੀਟਰ, ਯੂ-ਟਿਊਬ, ਵਟਸ ਐਪ ਅਤੇ ਬਲੌਗਰ ਆਦਿ ਸਮਾਜਿਕ ਵੈੱਬਸਾਈਟਾਂ ਵਿਚਾਰਾਂ ਦੇ ਪ੍ਰਵਾਹ ਲਈ ਇਕ ਸਾਂਝਾ ਪਲੇਟਫ਼ਾਰਮ ਪ੍ਰਦਾਨ ਕਰਦੀਆਂ ਹਨ | ਇਹ ਉਨ੍ਹਾਂ ਲੇਖਕਾਂ ਲਈ ਵਰਦਾਨ ਸਾਬਤ ਹੋਈਆਂ ਹਨ, ਜਿਨ੍ਹਾਂ ਦੇ ਸ਼ਬਦਾਂ ਵਿਚ ਡਾਂਗ ਵਰਗਾ ਖੜਾਕ ਹੈ ਪਰ ਉਨ੍ਹਾਂ ਨੂੰ ਪਿ੍ੰਟ ਅਤੇ ਇਲੈਕਟ੍ਰਾਨਿਕ ਮੀਡੀਆ ਵਿਚ ਅਣਗੌਲਿਆ ਜਾ ਰਿਹਾ ਹੈ | ਯੂਨੀਕੋਡ ਫੌਾਟ ਰਾਹੀਂ ਆਪਣੀ ਭਾਸ਼ਾ ਦੇ ਪ੍ਰਚਾਰ-ਪ੍ਰਸਾਰ ਲਈ ਅਜਿਹੀਆਂ ਸਾਈਟਾਂ ਦੀ ਵਰਤੋਂ ਸਾਰਥਿਕ ਮੰਨੀ ਗਈ ਹੈ | ਨਾ-ਮਾਤਰ ਕੀਮਤ 'ਤੇ ਖੁੱਲ੍ਹੇ ਵਿਚਾਰਾਂ ਦਾ ਅਦਾਨ-ਪ੍ਰਦਾਨ ਕਰਨ ਲਈ ਵਰਤੀਆਂ ਜਾਂਦੀਆਂ ਇਹ ਸਾਈਟਾਂ ਨੌਜਵਾਨ ਪੀੜ੍ਹੀ 'ਚ ਇਕ ਨਵੀਂ ਰੂਹ ਫ਼ੂਕ ਰਹੀਆਂ ਹਨ |
ਸਿਰਜਣਾਤਮਿਕ ਵਰਤੋਂ ਦੇ ਨਾਲ-ਨਾਲ ਕਈ ਵਰਤੋਂਕਾਰ ਇਸ 'ਤੇ ਅਸ਼ਲੀਲ ਟਿੱਪਣੀਆਂ, ਭੜਕਾਊ ਬਿਆਨਬਾਜ਼ੀ, ਨੰਗੇਜ ਨੂੰ ਹੁਲਾਰਾ ਦੇਣ ਵਾਲੀਆਂ ਫ਼ੋਟੋਆਂ ਅਤੇ ਵੀਡੀਓ ਪਾ ਕੇ ਅਪਰਾਧਾਂ ਨੂੰ ਜਨਮ ਦੇ ਰਹੇ ਹਨ | ਇਸ ਲਈ ਜ਼ਰੂਰੀ ਹੈ ਕਿ ਸਮਾਜਿਕ ਨੈੱਟਵਰਕ ਸਾਈਟਾਂ ਦੀ ਬੜੀ ਸਾਵਧਾਨੀ ਨਾਲ ਵਰਤੋਂ ਕੀਤੀ ਜਾਵੇ | ਜਿਵੇਂ ਕਿ:
ਪਾਸਵਰਡ ਸੁਰੱਖਿਅਤ ਅਤੇ ਗੁੰਝਲਦਾਰ ਰੱਖੋ | ਇਸ ਨੂੰ ਸਮੇਂ-ਸਮੇਂ 'ਤੇ ਬਦਲਦੇ ਰਹੋ |
ਲੜਕੀਆਂ ਆਪਣੀ ਅਸਲ ਪ੍ਰੋਫਾਈਲ ਫ਼ੋਟੋ ਅੱਪਡੇਟ ਨਾ ਕਰਨ |
ਫੇਸਬੁਕ 'ਤੇ ਅਜਿਹਾ ਕਰਨ ਲਈ ਸੁਰੱਖਿਆ ਦੇ ਖ਼ਾਸ ਨੁਸਿਖ਼ਆਂ ਨੂੰ ਅਪਣਾਉਣਾ ਚਾਹੀਦਾ ਹੈ | ਵੱਡੀ ਮਿੱਤਰਤਾ ਸੂਚੀ ਦੀ ਬਜਾਏ ਉਸਾਰੂ ਸੋਚ ਵਾਲੀ ਛੋਟੀ ਸੂਚੀ 'ਤੇ ਫ਼ਖਰ ਕਰਨਾ ਚਾਹੀਦਾ ਹੈ | ਅਸੱਭਿਅਕ ਪੋਸਟਾਂ ਪਾਉਣ 'ਤੇ ਮਿੱਤਰ ਨੂੰ ਸੂਚੀ ਵਿਚੋਂ 'ਥਾਲ਼ੀ ਛੇਕ' ਕਰ ਦੇਣਾ ਚਾਹੀਦਾ ਹੈ |
ਪ੍ਰੋਫਾਈਲ ਵਿਚ ਜਾਣਕਾਰੀ ਸੋਚ-ਸਮਝ ਕੇ ਪਾਓ
ਜਿੱਥੋਂ ਤੱਕ ਸੰਭਵ ਹੋਵੇ ਲੜਕੀਆਂ ਆਪਣੀ ਨਿੱਜੀ ਜਾਣਕਾਰੀ ਦਾ ਵੇਰਵਾ ਅਤੇ ਹੋਰ ਪੋਸਟਾਂ 'ਪਬਲਿਕ' ਦੀ ਬਜਾਏ ਆਪਣੀ ਮਿੱਤਰਤਾ ਸੂਚੀ ਤੱਕ ਹੀ ਸੀਮਤ ਰੱਖਣ |

ਇੰਜ ਹਟਾਓ ਫ਼ਾਲਤੂ ਐਪਸ (20141121)

ਐਂਡਰਾਇਡ ਫੋਨ ਦੀ ਪੀਸੀ ਦੇ ਮੁਕਾਬਲੇ ਮੈਮਰੀ ਸਮਰੱਥਾ ਬਹੁਤ ਘੱਟ ਹੁੰਦੀ ਹੈ। ਇਸ ਵਿੱਚ ਸਿਰਫ਼ ਉਹ ਐਪਸ ਹੀ ਰੱਖਣੀਆਂ ਚਾਹੀਦੀਆਂ ਹਨ ਜਿਨ੍ਹਾਂ ਦੀ ਤੁਹਾਨੂੰ ਜ਼ਰੂਰਤ ਹੈ। ਵੱਧ ਗਿਣਤੀ ’ਚ ਐਪਸ ਨੂੰ ਸਾਂਭਣ ਨਾਲ ਤੁਹਾਡੇ ਮੋਬਾਈਲ ਫੋਨ ਦੀ ਰਫ਼ਤਾਰ ਘਟ ਸਕਦੀ ਹੈ। ਇਸ ਸਥਿਤੀ ਵਿੱਚ ਮੋਬਾਈਲ  ਦੀਆਂ ਅਣਚਾਹੀਆਂ ਐਪਸ ਨੂੰ ਹਟਾਉਣਾ ਬਹੁਤ ਜ਼ਰੂਰੀ ਹੈ। ਗ਼ੈਰਜ਼ਰੂਰੀ ਐਪਸ ਨੂੰ ਬਾਹਰ ਕੱਢਣ ਦਾ ਤਰੀਕਾ ਹੇਠਾਂ ਲਿਖੇ ਅਨੁਸਾਰ ਹੈ:
* ਆਪਣੇ ਮੋਬਾਈਲ  ਦੀਆਂ ਸੈਟਿੰਗਜ਼ ਨੂੰ ਖੋਲ੍ਹੋ।
* ਹੁਣ ਐਪਸ (Apps) ਉੱਤੇ ਟੱਚ ਕਰੋ।
* ਇੱਕ ਨਵੀਂ ਸਕਰੀਨ ’ਤੇ ਉਹ ਸਾਰੀਆਂ ਐਪਸ ਨਜ਼ਰ ਆਉਣਗੀਆਂ ਜੋ ਤੁਹਾਡੇ ਮੋਬਾਈਲ ਵਿੱਚ ਇੰਸਟਾਲ ਹਨ।
* ਹਟਾਈ ਜਾਣ ਵਾਲੀ ਐਪ ਨੂੰ ਚੁਣੋ।
* ਹੁਣ ਅਨ-ਇੰਸਟਾਲ ਕਮਾਂਡ ਨੂੰ ਚੁਣੋ।
* ਐਂਡਰਾਇਡ ਤੁਹਾਡੇ ਤੋਂ ਐਪ ਹਟਾਉਣ ਬਾਰੇ ਪੁਸ਼ਟੀ ਕਰੇਗਾ। ਇੱਥੋਂ ਓਕੇ ’ਤੇ ਕਲਿੱਕ ਕਰ ਦਿਓ।
* ਫਿਰ ਓਕੇ ਕਰਕੇ ਪ੍ਰਕਿਰਿਆ ਪੂਰੀ ਕਰੋ।
ਇਸੇ ਤਰ੍ਹਾਂ ਬਾਕੀ ਫ਼ਾਲਤੂ ਐਪਸ ਨੂੰ ਵੀ ਮੋਬਾਈਲ ’ਚ ਹਟਾਇਆ ਜਾ ਸਕਦਾ ਹੈ।

2014-11-16

ਕੰਪਿਊਟਰ ਅਤੇ ਇੰਟਰਨੈੱਟ ਦੀ ਸੁਰੱਖਿਅਤ ਵਰਤੋਂ-7 (20141116)

ਸੁਰੱਖਿਅਤ ਨੈੱਟ ਬੈਂਕਿੰਗ
ਨੈੱਟ ਬੈਂਕਿੰਗ ਇਕ ਆਧੁਨਿਕ ਸੁਵਿਧਾ ਹੈ, ਜਿਸ ਨਾਲ ਪੈਸਿਆਂ ਦਾ ਲੈਣ-ਦੇਣ ਇੰਟਰਨੈੱਟ ਰਾਹੀਂ ਹੋ ਜਾਂਦਾ ਹੈ | ਵਪਾਰ ਅਤੇ ਬੈਂਕਿੰਗ ਦੇ ਖੇਤਰ 'ਚ ਇਸ ਨੇ ਇਕ ਨਵੀਂ ਪਰੰਪਰਾ ਕਾਇਮ ਕੀਤੀ ਹੈ | ਸੁਰੱਖਿਅਤ ਨੈੱਟ ਬੈਂਕਿੰਗ ਦੇ ਨੁਸਿਖ਼ਆਂ ਬਾਰੇ ਜਾਣਕਾਰੀ ਨਾ ਹੋਣ ਕਾਰਨ ਕਈ ਲੋਕਾਂ ਨੂੰ ਠੱਗੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਨੈੱਟ ਬੈਂਕਿੰਗ ਦੀ ਵਰਤੋਂ ਸਮੇਂ ਹੇਠਾਂ ਲਿਖੀਆਂ ਸਾਵਧਾਨੀਆਂ ਵਰਤਣੀਆਂ ਚਾਹੀਦੀਆਂ ਹਨ:
ਪ੍ਰਸਿੱਧ ਬੈਂਕਾਂ ਅਤੇ ਵੱਡੇ ਅਦਾਰਿਆਂ ਦੀਆਂ ਨਕਲੀ ਵੈੱਬਸਾਈਟਾਂ ਵੀ ਉਪਲਬਧ ਹੋ ਸਕਦੀਆਂ ਹਨ | ਬੈਂਕਿੰਗ ਲਈ ਵਰਤੀ ਜਾਣ ਵਾਲੀ ਅਸਲ ਵੈੱਬਸਾਈਟ ਦਾ ਪਤਾ ਲਗਾਉਣ ਲਈ ਬ੍ਰਾਊਜ਼ਰ ਦੀ ਐਡਰੈੱਸ ਬਾਰ 'ਤੇ ਵੇਖੋ ਕਿ ਵੈੱਬਸਾਈਟ ਦੇ ਪਤੇ ਤੋਂ ਪਹਿਲਾਂ ਹਰੇ ਰੰਗ ਦੀ ਪੱਟੀ ਅਤੇ ਇਸ ਵਿਚ ਲੌਕ ਦਾ ਚਿੰਨ੍ਹ ਨਜ਼ਰ ਆ ਰਿਹਾ ਹੈ | ਸਹੀ ਵੈੱਬਸਾਈਟ ਦੀ ਪੁਸ਼ਟੀ ਲਈ ਸ਼ਬਦ http ਜਾਂ https ਲਿਖਿਆ ਨਜ਼ਰ ਆਉਂਦਾ ਹੈ | ਜੇ ਹਾਂ, ਤਾਂ ਤੁਸੀਂ ਸਹੀ ਅਤੇ ਸੁਰੱਖਿਅਤ ਵੈੱਬਸਾਈਟ ਦੀ ਵਰਤੋਂ ਕਰ ਰਹੇ ਹੋ |
ਅਪਰਾਧੀ ਲੋਕ ਅਸਲ ਵੈੱਬਸਾਈਟ ਦੇ ਨਾਂਅ ਨਾਲ ਰਲਦੇ-ਮਿਲਦੇ ਨਾਂਅ ਵਾਲੀ ਵੈੱਬਸਾਈਟ ਦਾ ਸਾਂਚਾ ਤਿਆਰ ਕਰ ਲੈਂਦੇ ਹਨ | ਸਾਂਚੇ ਵਿਚ 'ਜੈਕਿੰਗ ਹੈੱਕ' ਰਾਹੀਂ ਕਿਸੇ ਦੂਸਰੀ ਵੈੱਬਸਾਈਟ ਨੂੰ ਹੂ-ਬ-ਹੂ ਦਿਖਾਇਆ ਜਾਂਦਾ ਹੈ ਜੋ ਕਿ ਅਸਲ ਵੈੱਬਸਾਈਟ ਦਾ ਭੁਲੇਖਾ ਪਾਉਂਦੀ ਹੈ | ਇਸ ਲਈ ਵਰਤੋਂਕਾਰ ਨੂੰ ਵੈੱਬਸਾਈਟ ਦੇ ਪਤੇ (URL) ਬਾਰੇ ਖ਼ਾਸ ਧਿਆਨ ਰੱਖਣਾ ਚਾਹੀਦਾ ਹੈ |
ਬੈਂਕਾਂ ਅਤੇ ਵਿੱਤੀ ਅਦਾਰਿਆਂ ਨੂੰ ਹਿਸਾਬ-ਕਿਤਾਬ ਕਰਨ ਵਾਲੇ ਸਾਫਟਵੇਅਰਾਂ ਦਾ ਵਿਕਾਸ ਕਿਸੇ ਪ੍ਰਸਿੱਧ ਤੇ ਚੰਗੇ ਅਕਸ ਵਾਲੀ ਕੰਪਨੀ ਤੋਂ ਕਰਵਾਉਣਾ ਚਾਹੀਦਾ ਹੈ | ਕਈ ਬੈਂਕ 'ਬਲੈਕ ਹੋਲ਼' ਰਾਹੀਂ ਕਿਸ਼ਤ-ਬੱਧੀ ਠੱਗੀ ਦਾ ਸ਼ਿਕਾਰ ਹੋ ਚੁੱਕੇ ਹਨ | ਬਲੈਕ ਹੋਲ ਸਾਫ਼ਟਵੇਅਰ ਵਿਕਾਸਕਰਤਾ ਵੱਲੋਂ ਜਾਣ ਬੁੱਝ ਕੇ ਰੱਖੀ ਗਈ ਤਰੁੱਟੀ ਹੈ | ਇਸ ਰਾਹੀਂ ਬੈਂਕ ਦੇ ਹਰੇਕ ਖਾਤੇ ਵਿਚੋਂ ਕਿਸ਼ਤ-ਦਰ-ਕਿਸ਼ਤ ਥੋੜ੍ਹੇ-ਥੋੜ੍ਹੇ ਪੈਸੇ ਕੱਟੇ ਜਾਂਦੇ ਹਨ | ਇਹ ਰਾਸ਼ੀ ਸਿੱਧੀ ਸਾਫ਼ਟਵੇਅਰ ਵਿਕਾਸਕਾਰ ਦੇ ਖਾਤੇ 'ਚ ਜਮ੍ਹਾਂ ਹੁੰਦੀ ਰਹਿੰਦੀ ਹੈ | ਇਸ ਦੀ ਭਿਣਕ ਬੈਂਕ ਅਧਿਕਾਰੀਆਂ ਨੂੰ ਵੀ ਨਹੀਂ ਪੈਂਦੀ |
ਸਮਾਰਟ ਫ਼ੋਨ 'ਤੇ ਨੈੱਟ ਬੈਂਕਿੰਗ ਦੀ ਵਰਤੋਂ ਬੜੀ ਸਾਵਧਾਨੀ ਨਾਲ ਕਰੋ | ਪਾਸਵਰਡ ਨੂੰ ਕਦੇ ਵੀ ਸਥਾਈ ਤੌਰ 'ਤੇ ਸੇਵ ਕਰਕੇ ਨਾ ਰੱਖੋ |
ਬੈਂਕ ਖਾਤੇ ਵਿਚ ਪੈਸੇ ਪਾਉਣ ਜਾਂ ਕਢਵਾਉਣ ਦਾ ਤੁਰੰਤ ਵੇਰਵਾ ਜਾਣਨ ਲਈ ਐੱਸਐੱਮਐੱਸ ਅਲਰਟ ਲਗਵਾ ਲਓ |
ਕਰੈਡਿਟ, ਡੈਬਿਟ ਅਤੇ ਏਟੀਐੱਮ ਕਾਰਡ ਬਾਰੇ ਜਾਣਕਾਰੀ ਗੁਪਤ ਰੱਖੋ |
ਨੈੱਟ ਬੈਂਕਿੰਗ ਦਾ ਪਾਸਵਰਡ ਖੋਲ੍ਹਣ ਸਮੇਂ ਜਿੱਥੋਂ ਤੱਕ ਹੋ ਸਕੇ ਵਰਚੂਅਲ ਕੀ-ਬੋਰਡ ਦੀ ਵਰਤੋਂ ਕਰੋ |
ਕਿਸੇ ਸਟੋਰ ਮੌਲ ਜਾਂ ਦੁਕਾਨ ਤੋਂ ਕੀਤੀ ਖ਼ਰੀਦਦਾਰੀ ਦਾ ਆਨਲਾਈਨ ਭੁਗਤਾਨ ਕਰਨ ਸਮੇਂ ਡੈਬਿਟ ਕਾਰਡ/ਏਟੀਐੱਮ ਕਾਰਡ ਨੂੰ ਸਵਾਈਪ ਕਰਵਾਉਣ ਉਪਰੰਤ ਵਾਪਸ ਲੈ ਲਓ ਤੇ ਪਾਸਵਰਡ ਬੜੀ ਸਾਵਧਾਨੀ ਨਾਲ ਲਗਾਓ |
ਕਦੇ ਵੀ ਏਟੀਐੱਮ ਕਾਰਡ ਅਤੇ ਉਸ ਦਾ ਪਿੰਨ (ਪਾਸਵਰਡ) ਇਕੱਠੇ ਨਾ ਰੱਖੋ |
ਆਨਲਾਈਨ ਖ਼ਰੀਦਦਾਰੀ ਲਈ ਤਸੱਲੀਬਖ਼ਸ਼ ਵੈੱਬਸਾਈਟ ਦੀ ਵਰਤੋਂ ਕਰੋ 

ਸੰਪਰਕ ਸੂਚੀ ਨੂੰ ਸਮਾਰਟ ਫੋਨ ’ਚ ਕਿਵੇਂ ਸਾਂਭੀਏ? (20141114)

ਸੂਚਨਾ ਤਕਨਾਲੋਜੀ ਦੇ ਸਾਏ ਹੇਠ ਨਿਤ-ਰੋਜ਼ ਨਵੇਂ ਇਲੈਕਟ੍ਰੋਨਿਕ ਉਤਪਾਦਾਂ ਦਾ ਵਿਕਾਸ ਹੋ ਰਿਹਾ ਹੈ। ਕੰਪਿਊਟਰ ਤਕਨਾਲੋਜੀ ਅਕਾਸ਼ ਦੀਆਂ ਬੁਲੰਦੀਆਂ ਛੂਹ ਰਹੀ ਹੈ। ਅਜੋਕੇ ਸਮਾਰਟ ਤਕਨਾਲੋਜੀ ਦੇ ਸਮਾਰਟ ਦੌਰ ਵਿੱਚ ਸਾਡੇ ਵਿੱਚੋਂ ਕਈ ਪਾਠਕ ਸਮਾਰਟ ਫੋਨ ਦੀ ਵਰਤੋਂ ਕਰ ਰਹੇ ਹੋਣਗੇ।
ਨਵੇਂ ਵਰਤੋਂਕਾਰਾਂ ਨੂੰ ਨਵੀਂ ਤਕਨੀਕ ਵਰਤਦਿਆਂ ਕਈ ਮੁਸ਼ਕਲਾਂ ਨਾਲ ਦੋ-ਚਾਰ ਹੋਣਾ ਪੈਂਦਾ ਹੈ। ਇਨ੍ਹਾਂ ਸਮੱਸਿਆਵਾਂ ਵਿੱਚੋਂ ਸੰਪਰਕ ਸੂਚੀ ਜਾਂ ਐਡਰੈੱਸ ਬੁੱਕ ਨੂੰ ਆਪਣੇ ਫੋਨ ਜਾਂ ਈ-ਮੇਲ ਖਾਤੇ ਵਿੱਚ ਸਾਂਭਣਾ ਇੱਕ ਅਹਿਮ ਮਸਲਾ ਹੈ। ਅਸੀਂ ਆਪਣੀ ਸੰਪਰਕ ਸੂਚੀ ਨੂੰ ਐਕਸਲ ਵਿੱਚ ਤਿਆਰ ਕਰ ਕੇ ਆਪਣੇ ਸਮਾਰਟ ਫੋਨ ਵਿੱਚ ਸਾਂਭ ਸਕਦੇ ਹਾਂ। ਆਓ ਇਸ ਬਾਰੇ ਵਿਸਥਾਰ ਸਹਿਤ ਚਰਚਾ ਕਰੀਏ।
ਸਮਾਰਟ ਫੋਨ
ਅਸੀਂ ਜਾਣਦੇ ਹਾਂ ਕਿ ਸਮਾਰਟ ਫੋਨ ਵਿੱਚ ਸੰਪਰਕ ਨਾਂ ਅਤੇ ਫੋਨ ਨੰਬਰ ਸਟੋਰ ਕਰਨ ਦੀ ਸੁਵਿਧਾ ਹੁੰਦੀ ਹੈ। ਇਨ੍ਹਾਂ ਨੰਬਰਾਂ ਨੂੰ ਅਸੀਂ ਫੋਨ ਵਿੱਚੋਂ ਸਰਚ ਕਰਕੇ ਡਾਇਲ ਕਰ ਸਕਦੇ ਹਾਂ। ਕਈ ਵਾਰ ਫੋਨ ਵਿੱਚ ਕੋਈ ਖ਼ਰਾਬੀ ਹੋਣ ਕਾਰਨ ਜਾਂ ਫੋਨ ਦੇ ਗੁੰਮ ਹੋਣ ਦੀ ਸੂਰਤ ਵਿੱਚ ਅਸੀਂ ਸੰਪਰਕ ਨੰਬਰ ਗੁਆ ਬੈਠਦੇ ਹਾਂ। ਇਸ ਸਮੱਸਿਆ ਨੂੰ ਹੱਲ ਕਰਨ ਦੇ ਕਈ ਤਰੀਕੇ ਹਨ। ਅਸੀਂ ਆਪਣੇ ਸੰਪਰਕ ਨੰਬਰਾਂ ਨੂੰ ਐਕਸਪੋਰਟ ਕਰਕੇ ਆਪਣੇ ਆਪ ਨੂੰ ਈ-ਮੇਲ ਭੇਜ ਕੇ ਸਾਂਭ ਸਕਦੇ ਹਾਂ। ਸੰਪਰਕ ਸੂਚੀ ਨੂੰ ਸੌਖੇ ਤਰੀਕੇ ਨਾਲ ਤਿਆਰ ਕਰਨਾ ਇੱਕ ਅਲੱਗ ਮਸਲਾ ਹੈ। ਇਸ ਮਸਲੇ ਦੇ ਹੱਲ ਲਈ ਐਕਸਲ ਵਰਕਸ਼ੀਟ ਦਾ ਸਹਾਰਾ ਲੈਣਾ ਸਭ ਤੋਂ ਸਿੱਕੇਬੰਦ ਤਰੀਕਾ ਹੈ।
ਐਕਸਲ ਵਿੱਚ ਸੂਚੀ ਬਣਾਉਣਾ
* ਐਕਸਲ ਦੇ ਪਹਿਲੇ ਕਾਲਮ (ਕਾਲਮ 1) ਵਿੱਚ ਦੇ ਸਿਖ਼ਰ ’ਤੇ Contact Name ਅਤੇ ਦੂਜੇ ਕਾਲਮ (ਕਾਲਮ 2) ਦੇ ਸਿਖ਼ਰ ’ਤੇ Number ਟਾਈਪ ਕਰੋ।
* ਹੇਠਾਂ (ਕ੍ਰਮਵਾਰ) ਨਾਂ ਅਤੇ ਨੰਬਰ ਟਾਈਪ ਕਰਦੇ ਜਾਓ।
* ਐਕਸਲ ਦੀਆਂ ਬਾਕੀ ਦੀਆਂ ਵਰਕਸ਼ੀਟਾਂ ਵਾਲੇ ਹੇਠਾਂ ਨਜ਼ਰ ਆਉਣ ਵਾਲੇ ਟੈਬ (Sheet 2 ਅਤੇ Sheet 3) ਨੁੂੰ ਡਿਲੀਟ ਕਰ ਦਿਓ।
* ਵਰਕਸ਼ੀਟ ਨੂੰ ਸੇਵ ਕਰ ਲਓ।
ਐਕਸਲ ਦੀ ਫਾਈਲ ਨੂੰ ਮੋਬਾਈਲ ਫੋਨ ਵਿੱਚ ਪਾਉਣਾ
* ਸਭ ਤੋਂ ਪਹਿਲਾਂ ਆਪਣੇ ਸਮਾਰਟ ਫੋਨ ਦੇ ਫਾਈਲ ਮੈਨੇਜਰ ਨੂੰ ਖੋਲ੍ਹ ਕੇ ਇੰਟਰਨਲ ਐਸਡੀ ਕਾਰਡ ਵਿੱਚ ਜਾਓ। ਇੱਥੇ ਇੱਕ ਐਕਸਲ ਕਾਨਟੈਕਟਸ (Excel Contacts) ਨਾਂ ਦਾ ਫੋਲਡਰ ਬਣਾਓ।
* ਆਪਣੇ ਮੋਬਾਈਲ ਫੋਨ ਨੂੰ ਕੰਪਿਊਟਰ ਨਾਲ ਜੋੜਨ ਲਈ ਯੂਐੱਸਬੀ ਕੇਬਲ ਦੀ ਵਰਤੋਂ ਕਰੋ। ਉਂਜ ਇੱਕ ‘ਸਾਫ਼ਟਵੇਅਰ ਡਾਟਾ ਕੇਬਲ’ ਨਾਂ ਦੀ ਐਂਡਰਾਇਡ ਐਪ ਰਾਹੀਂ ਅਸੀਂ ਆਪਣੇ ਫੋਨ ਨੂੰ ਵਾਈ-ਫਾਈ ਰਾਹੀਂ ਕੰਪਿਊਟਰ ਨਾਲ ਜੋੜ ਸਕਦੇ ਹਾਂ।
* ਜਦੋਂ ਮੋਬਾਇਲ ਅਤੇ ਕੰਪਿਊਟਰ ਆਪਸ ਵਿੱਚ ਜੁੜ ਜਾਣ ਤਾਂ ਆਪਣੇ ਕੰਪਿਊਟਰ ਦੇ ਵਿੰਡੋਜ਼ ਐਕਸਪਲੋਰਰ ’ਚ ਇਨਟਰਨਲ ਐੱਸਡੀ ਕਾਰਡ ਖੋਲ੍ਹੋ ਅਤੇ ਇਸ ਵਿੱਚ ਬਣੇ (ਨਵੇਂ) ਫੋਲਡਰ (Excel Contacts) ਵਿੱਚ ਆਪਣੀ ਐਕਸਲ ਦੀ ਫਾਈਲ ਸੇਵ ਕਰੋ।
* ਯੂਐੱਸਬੀ ਜਾਂ ਵਾਈ-ਫਾਈ ਕੁਨੈਕਸ਼ਨ ਕੱਟ ਦਿਓ।
ਸੰਪਰਕ ਸੂਚੀ ਵਾਲੀ ਐਪ ਡਾਊਨਲੋਡ ਕਰਨਾ
* ਐਪ ਡਾਊਨਲੋਡ ਕਰਨ ਲਈ ਸਭ ਤੋਂ ਪਹਿਲਾਂ ਆਪਣੇ ਮੋਬਾਈਲ ਦਾ ਇੰਟਰਨੈੱਟ ਕੁਨੈਕਸ਼ਨ ਚਾਲੂ ਕਰੋ।
* ਗੂਗਲ ਐਪ ਸਟੋਰ ’ਤੇ ਜਾਓ।
* ਸਰਚ ਬਾਰ ਵਿੱਚ Excel Contacts ਭਰ ਕੇ ਸਰਚ ਕਰੋ।
* ਉਪਰੋਕਤ ਨਾਂ ਵਾਲੀ ਐਪ ਨੂੰ ਡਾਊਨਲੋਡ ਕਰਕੇ ਇੰਸਟਾਲ ਕਰ ਲਓ।
ਸੰਪਰਕ ਸੂਚੀ ਦਾਖ਼ਲ (import) ਕਰਨਾ
ਐਕਸਲ ਦੀ ਸੰਪਰਕ ਸੂਚੀ ਨੂੰ ਮੋਬਾਈਲ ਵਿੱਚ ਵਰਤਣ (ਇੰਪੋਰਟ ਕਰਨ) ਲਈ ਹੇਠਾਂ ਲਿਖੇ ਸਟੈੱਪ ਵਰਤੋ:
* ਸਭ ਤੋਂ ਪਹਿਲਾਂ ਐਪ ਖੋਲ੍ਹੋ।
* ਇੰਪੋਰਟ ਐਕਸਲ (import Excel) ’ਤੇ ਟੱਚ ਕਰੋ।
* ਅੰਦਰੂਨੀ ਐੱਸਡੀ ਕਾਰਡ ਵਿੱਚ ਨਵੇਂ ਬਣਾਏ ਫੋਲਡਰ ਵਿਚਲੀ ਐਕਸਲ ਫਾਈਲ ਨਜ਼ਰ ਆਵੇਗੀ। ਇਸ ਨੂੰ ਚੁਣੋ ਅਤੇ ਓਕੇ ’ਤੇ ਟੱਚ ਕਰੋ।
* ਤੁਸੀਂ ਦੇਖੋਗੇ ਕਿ ਕੁਝ ਕੁ ਸਕਿੰਟਾਂ ਵਿੱਚ ਐਕਸਲ ਵਿਚਲੀ ਸੰਪਰਕ ਸੂਚੀ ਤੁਹਾਡੇ ਮੋਬਾਈਲ ਵਿੱਚ ਇੰਸਟਾਲ ਹੋ ਜਾਵੇਗੀ।
ਸੰਪਰਕ ਸੂਚੀ ਨੂੰ ਸੁਰੱਖਿਅਤ (Export) ਕਰਨਾ
ਆਪਣੇ ਮੋਬਾਈਲ ਵਿੱਚ ਸਾਂਭੀ ਸੰਪਰਕ ਸੂਚੀ ਦਾ ਐਕਸਲ ਸ਼ੀਟ ਦੇ ਰੂਪ ਵਿੱਚ ਬੈਕ-ਅਪ ਰੱਖਣ ਲਈ ਹੇਠਾਂ ਲਿਖਿਆ ਤਰੀਕਾ ਅਪਣਾਇਆ ਜਾ ਸਕਦਾ ਹੈ:
* ਐਪ ਖੋਲ੍ਹ ਕੇ ਐਕਸਪੋਰਟ ਐਕਸਲ (Export Excel) ’ਤੇ ਟੱਚ ਕਰੋ।
* ਸੀਵੀਐੱਸ (CVS) ਫਾਰਮੈਟ ਵਾਲੀ ਫਾਈਲ ਅੰਦਰੂਨੀ ਐਸਡੀ ਕਾਰਡ ਵਿੱਚ ਬਣੇ ਐਕਸਲ ਕਾਨਟੈਕਟਸ (Excel Contacts) ਨਾਂ ਦੇ ਫੋਲਡਰ ਵਿੱਚ ਸੇਵ ਹੋ ਜਾਵੇਗੀ।
* ਫਾਈਲ ਨੂੰ ਡਾਟਾ ਕੇਬਲ ਜਾਂ ਵਾਈ-ਫਾਈ ਵਾਲੀ ਐਪ ਰਾਹੀਂ ਆਪਣੇ ਕੰਪਿਊਟਰ ਵਿੱਚ ਭੇਜ ਕੇ ਸੇਵ ਕੀਤਾ ਜਾ ਸਕਦਾ ਹੈ। ਇਸ ਫਾਈਲ ਨੂੰ ਐਕਸਲ ਵਰਕਸ਼ੀਟ ਵਜੋਂ ਖੋਲ੍ਹ ਕੇ ਸੰਪਾਦਿਤ ਕੀਤਾ ਜਾ ਸਕਦਾ ਹੈ ਤੇ ਮੁੜ ਫੋਨ ਵਿੱਚ ਪਾਇਆ (Import) ਕੀਤਾ ਜਾ ਸਕਦਾ ਹੈ।
ਸੰਪਰਕ ਸੂਚੀ ਸਾਂਝੀ (Share) ਕਰਨਾ

ਇਸ ਐਪ ਵਿੱਚ Export ਕੀਤੀ ਸੰਪਰਕ ਸੂਚੀ ਵਾਲੀ ਫਾਈਲ ਨੂੰ ਈ-ਮੇਲ, ਬਲਿਊ ਟੁੱਥ, ਮੈਸੇਜ, ਵਟਸ ਐਪ ਆਦਿ ਰਾਹੀਂ ਸਾਂਝਾ (Share) ਕਰਨ ਦੀ ਸੁਵਿਧਾ ਵੀ ਹੈ। ਇਸ ਦੇ ਸਟੈੱਪ ਨਿਮਨ ਅਨੁਸਾਰ ਹਨ:
* ਐਪ ਚਾਲੂ ਕਰਨ ਉਪਰੰਤ ਸ਼ੇਅਰ ਐਕਸਲ (Share Excel) ’ਤੇ ਕਲਿੱਕ ਕਰੋ।
* ਜੇ ਸੰਪਰਕ ਸੂਚੀ ਜੀ-ਮੇਲ ਰਾਹੀਂ ਸਾਂਝਾ ਕਰਨਾ ਚਾਹੁੰਦੇ ਹੋ ਤਾਂ ’ਜੀ-ਮੇਲ’ ’ਤੇ ਕਲਿੱਕ ਕਰੋ।
* ਐਕਸਲ ਦੀ ਫਾਈਲ ਅਟੈਚ ਹੋ ਜਾਵੇਗੀ। ਸੂਚੀ ਕਿਸ ਨੂੰ ਭੇਜੀ ਜਾਣੀ ਹੈ ਉਸ ਦਾ ਈ-ਮੇਲ ਪਤਾ ਟਾਈਪ ਕਰੋ ਤੇ ਸੈਂਡ (Send) ’ਤੇ ਕਲਿੱਕ ਕਰ ਦਿਓ।
ਵੱਖ-ਵੱਖ ਫਾਈਲ ਫਾਰਮੈਟ

  • CSV (ਕੌਮਾਂ ਸਪਰੇਟਿਡ ਵੈਲਿਯੂ): ਇਹ ਵੱਖ-ਵੱਖ ਐਪਲੀਕੇਸ਼ਨਾਂ, ਸਪਰੈੱਡਸ਼ੀਟ ਡਾਟਾਬੇਸ ਆਦਿ ’ਚ ਵਰਤਿਆ ਜਾਣ ਵਾਲਾ ਫਾਈਲ ਫਾਰਮੈਟ ਹੈ।
  • VCard: ਇਹ ਇਲੈਕਟ੍ਰੋਨਿਕ ਬਿਜ਼ਨੈੱਸ ਕਾਰਡ ਲਈ ਵਰਤਿਆ ਜਾਣ ਵਾਲਾ ਇੱਕ ਮਿਆਰੀ ਫਾਈਲ ਫਾਰਮੈਟ ਹੈ।
  • apk: ਇਹ ਮੋਬਾਈਲ ਐਪਸ ਲਈ ਵਰਤਿਆ ਜਾਣ ਵਾਲਾ ਇੱਕ ਮਿਆਰੀ ਫਾਰਮੈਟ ਹੈ।
  • xls: ਇਹ ਐਕਸਲ-2003 ਦਾ ਐਕਸਟੈਨਸ਼ਨ (ਫਾਈਲ) ਨਾਂ ਹੈ।
  • xlsx: ਇਹ ਐਕਸਲ- 2007 ਦਾ ਐਕਸਟੈਨਸ਼ਨ ਨਾਂ ਹੈ।

ਐਕਸਲ ਸੰਪਰਕ ਸੂਚੀ ਲਈ ਮਹੱਤਵਪੂਰਨ ਐਪਸ
ਐਕਸਲ ਵਿੱਚ ਸੰਪਰਕ ਸੂਚੀ ਬਣਾ ਕੇ ਮੋਬਾਈਲ ਫੋਨ ਵਿੱਚ ਪਾਉਣ ਲਈ ਕਈ ਐਂਡਰਾਇਡ ਐਪਸ ਉਪਲਬਧ ਹਨ। ਇਨ੍ਹਾਂ ਵਿੱਚੋਂ Excel Contacts, Contact To Excel, Excel Contacts life ਅਤੇ Contact ਆਦਿ ਪ੍ਰਮੁੱਖ ਹਨ।
ਆਈ ਫੋਨ ਵਾਲੇ ਪਾਠਕ ਸਮਾਰਟ ਕੰਨੈਕਟਸ, ਲਾਈਫ ਹੈਕਰ ਆਦਿ ਵਿੱਚੋਂ ਕਿਸੇ ਐਪ ਨੂੰ ਡਾਊਨਲੋਡ ਕਰਕੇ ਵਰਤ ਸਕਦੇ ਹਨ।