About Me

My photo
C P Kamboj is the first author who has penned down 29 computer & IT books in Punjabi language. Also, he has translated several computer books from English to Punjabi. He is the regular columnist in Daily Ajit, Punjabi Tribune, Desh Sewak etc. So for, more than 2000 articles have been published in different magazines and dailies. Born at village Ladhuka (Distt. Fazilka), he has keen interest in computer from the childhood. Presently, he is working as a Assistant Professor at Punjabi Computer Help Centre, Punjabi University Patiala. He says that his prime mission to promote the modern technology and computer in Punjabi language. He desire to reach the computer to common man.

ਮਹੱਤਵਪੂਰਨ ਐਪ: ਵੱਟਸਐਪ (20150130)

ਇਹ ਐਂਡਰਾਇਡ ਅਤੇ ਹੋਰਨਾ ਸਮਾਰਟ ਫੋਨਾਂ ਲਈ ਵਰਤਿਆ ਜਾਣ ਵਾਲੀ ਮਹੱਤਵਪੂਰਨ ਐਪ ਹੈ। ਇਸ ਦੀ ਮਦਦ ਨਾਲ ਪਾਠ ਸੰਦੇਸ਼, ਫੋਟੋਆਂ, ਵੀਡੀਓ ਅਤੇ ਆਡੀਓ ਆਦਿ ਭੇਜੇ ਅਤੇ ਪ੍ਰਾਪਤ ਕੀਤੇ ਜਾ ਸਕਦੇ ਹਨ। ਵਟਸ ਐਪ ’ਤੇ ਇੱਕ ਦਿਨ ਵਿੱਚ ਅਣਗਿਣਤ ਸੰਦੇਸ਼ ਭੇਜੇ ਜਾ ਸਕਦੇ ਹਨ
ਪਰ ਸ਼ਰਤ ਇਹ ਕਿ ਤੁਹਾਡੇ ਮੋਬਾਈਲ ’ਤੇ ਇੰਟਰਨੈੱਟ ਦੀ ਤੇਜ਼ ਰਫ਼ਤਾਰ ਸਹੂਲਤ ਉਪਲਬਧ ਹੋਵੇ।
ਵਟਸ ਐਪ ਰਾਹੀਂ ਤੁਸੀਂ ਆਪਣੇ ਫੋਨ ਵਿੱਚ ਸਾਂਭੀ ਸੰਪਰਕ ਸੂਚੀ ਵਿੱਚੋਂ ਉਨ੍ਹਾਂ ਸਾਰੇ ਦੋਸਤਾਂ ਨੂੰ ਐੱਸਐੱਮਐੱਸ/ਸੰਦੇਸ਼ ਭੇਜ ਸਕਦੇ ਹੋ ਜਿਨ੍ਹਾਂ ਕੋਲ ਸਮਾਰਟ ਫੋਨ ਹੈ ਤੇ ਉਹ ਵਟਸ ਐਪ ਦੀ ਵਰਤੋਂ ਕਰਦੇ ਹਨ। ਵਟਸ ਐਪ ਖੋਲ੍ਹਦਿਆਂ ਹੀ ਇਹ ਬਾਖ਼ੂਬੀ ਸੰਪਰਕ ਸੂਚੀ ਵਿਚਲੇ ਉਨ੍ਹਾਂ ਦੋਸਤਾਂ ਦੇ ਸੰਪਰਕ ਨਾਂ ਅਤੇ ਫ਼ੋਟੋਆਂ ਆਦਿ ਦਿਖਾ ਦਿੰਦਾ ਹੈ ਜਿਨ੍ਹਾਂ ਨਾਲ ਵਟਸ ਐਪ ਰਾਹੀਂ ਸੰਪਰਕ ਸਾਧਿਆ ਜਾ ਸਕਦਾ ਹੈ।
ਵਟਸ ਐਪ ਵਿੱਚ ਤੁਸੀਂ ਆਪਣੇ ਰਿਸ਼ਤੇਦਾਰਾਂ, ਸਹਿਯੋਗੀਆਂ ਅਤੇ ਤੁਹਾਡੇ ਖੇਤਰ ਨਾਲ ਸਬੰਧਿਤ ਮਿੱਤਰਾਂ ਦੇ ਅਲੱਗ-ਅਲੱਗ ਸਮੂਹ (ਗਰੁੱਪ) ਬਣਾ ਸਕਦੇ ਹੋ। ਇੱਕ ਸਮੂਹ ਵਿੱਚ ਕੁੱਲ 50 ਵਿਅਕਤੀਆਂ ਨੂੰ ਸ਼ਾਮਲ ਕੀਤਾ ਜਾ ਸਕਦਾ ਹੈ। ਕੋਈ ਸੰਦੇਸ਼ ਜਾਂ ਤਸਵੀਰ ਆਦਿ ਨੂੰ ਸਮੂਹ ’ਤੇ ਪਾਉਣ ਨਾਲ ਉਸ ਨੂੰ ਸਮੂਹ ਦੇ ਸਾਰੇ ਮੈਂਬਰਾਂ ਤਕ ਪਹੁੰਚਾਇਆ ਜਾ ਸਕਦਾ ਹੈ।
ਵਟਸ ਐਪ ਲਈ ਕੋਈ ਵੱਖਰਾ ਖਾਤਾ ਬਣਾਉਣ ਦੀ ਲੋੜ ਨਹੀਂ ਕਿਉਂਕਿ ਇਹ ਤੁਹਾਡੇ ਫੋਨ ਨੰਬਰ ’ਤੇ ਕੰਮ ਕਰਦੀ ਹੈ। ਇਸੇ ਤਰ੍ਹਾਂ ਵੱਖਰੀ ਸੰਪਰਕ ਸੂਚੀ ਦੀ ਕੋਈ ਜ਼ਰੂਰਤ ਨਹੀਂ ਕਿਉਂਕਿ ਇਹ ਤੁਹਾਡੇ ਮੋਬਾਈਲ ਦੀ ਪਹਿਲਾਂ ਤੋਂ ਬਣੀ   ਸੰਪਰਕ ਸੂਚੀ ’ਤੇ ਆਧਾਰ ’ਤੇ ਕੰਮ ਕਰਦੀ ਹੈ।

No comments :

Post a Comment

Note: Only a member of this blog may post a comment.

ਗੂਗਲ ਪਲੇਅ ਸਟੋਰ (20150123)

ਗੂਗਲ ਪਲੇਅ ਸਟੋਰ ਗੂਗਲ ਦੀ ਇੱਕ ਵੱਡੀ ਮਾਰਕੀਟ ਹੈ। ਇਸ ਵਿੱਚ ਲੱਖਾਂ ਐਪਸ, ਵੀਡੀਓ ਅਤੇ ਕਿਤਾਬਾਂ ਆਦਿ ਉਪਲਬਧ ਹਨ। ਐਂਡਰਾਇਡ ਵਰਤੋਂਕਾਰਾਂ ਅਤੇ ਖੋਜਕਾਰਾਂ ਲਈ ਇਹ ਇੱਕ ਸਾਂਝਾ ਮੰਚ ਹੈ। ਗੂਗਲ ਪਲੇਅ ਸਟੋਰ ਰਾਹੀਂ ਕੰਪਿਊਟਰ ਪ੍ਰੋਗਰਾਮਰ ਆਪਣੀ ਐਂਡਰਾਇਡ ਐਪਲੀਕੇਸ਼ਨ ਨੂੰ ਵਰਤੋਂਕਾਰਾਂ ਤਕ ਪਹੁੰਚਾ ਸਕਦੇ ਹਨ।
ਗੂਗਲ ਆਪਣੇ ਸਟੋਰ ’ਤੇ ਅੱਪਡੇਟ ਦੀ ਸਹੂਲਤ ਵੀ ਪ੍ਰਦਾਨ ਕਰਵਾਉਂਦਾ ਹੈ। ਜਿਵੇਂ ਕਿ ਖੋਜਕਾਰ ਵੱਲੋਂ ਕਿਸੇ ਪੁਰਾਣੀ ਐਪ ਦਾ ਨਵਾਂ ਸੰਸਕਰਨ ਅੱਪਲੋਡ ਕੀਤਾ ਜਾਂਦਾ ਹੈ ਤਾਂ ਗੂਗਲ ਵਰਤੋਂਕਾਰਾਂ ਨੂੰ ਉਹ ਐਪ ਅੱਪਡੇਟ ਕਰਨ ਦਾ ਨੋਟੀਫ਼ਿਕੇਸ਼ਨ ਜਾਰੀ ਕਰਦਾ ਹੈ।
ਹੋਰਨਾਂ ਐਪ ਸਟੋਰਾਂ ਦੇ ਮੁਕਾਬਲੇ ਗੂਗਲ ਪਲੇਅ ਸਟੋਰ ’ਤੇ ਐਪਸ ਦੀ ਗਿਣਤੀ ਸਭ ਤੋਂ ਵੱਧ ਹੈ। ਪਿਛਲੇ ਵਰ੍ਹੇ ਤਕ ਐਪਲ ਦੇ ਐਪ ਸਟੋਰ ਅਤੇ ਗੂਗਲ ਪਲੇਅ ਸਟੋਰ ’ਤੇ ਉਪਲਬਧ ਐਪਸ ਦੀ ਗਿਣਤੀ ਲਗਪਗ ਬਰਾਬਰ ਸੀ ਪਰ ਇਸ ਵਰ੍ਹੇ ਗੂਗਲ ਐਪਸ ਦੀ ਗਿਣਤੀ ਵਿੱਚ ਬੇਹਿਸਾਬਾ ਉਛਾਲ ਆਇਆ ਹੈ।
ਏਸ਼ਿਆਈ ਖੋਜ ਏਜੰਸੀ ਦੀ ਰਿਪੋਰਟ ਮੁਤਾਬਕ 4 ਜਨਵਰੀ, 2013 ਤਕ ਗੂਗਲ ਪਲੇਅ ਸਟੋਰ ’ਤੇ ਕੁਲ 8 ਲੱਖ ਐਪਸ ਸਨ। ਸੱਤ ਜਨਵਰੀ, 2013 ਤਕ ਐਪਲ ਦੇ ਸਟੋਰ ’ਤੇ 7 ਲੱਖ 75 ਹਜ਼ਾਰ ਦੇ ਕਰੀਬ ਐਪਸ ਸਨ। ਇਸੇ ਤਰ੍ਹਾਂ 25 ਅਕਤੂਬਰ, 2012 ਦੇ ਵਿੰਡੋਜ਼ ਮਾਰਕੀਟ ਪਲੇਅ ’ਤੇ ਵਿੰਡੋਜ਼ ਐਪਸ ਦੀ ਗਿਣਤੀ 1 ਲੱਖ 25 ਹਜ਼ਾਰ ਸੀ। ਬਲੈਕ ਬੇਰੀ ਵਰਲਡ ’ਤੇ 30 ਜਨਵਰੀ, 2013 ਤਕ ਕੋਈ 70 ਹਜ਼ਾਰ ਐਪਸ ਉਪਲਬਧ ਸਨ। ਅੰਕੜਿਆਂ ਮੁਤਾਬਕ ਗੂਗਲ ਪਲੇਅ ਸਟੋਰ ’ਤੇ ਪਿਛਲੇ ਵਰ੍ਹੇ ਨਾਲੋਂ ਕਰੀਬ 2 ਲੱਖ ਤੋਂ ਵੱਧ ਐਪਸ ਦਾ ਵਾਧਾ ਹੋਇਆ ਹੈ। ਏਬੀਆਈ ਦੀ ਰਿਪੋਰਟ ਮੁਤਾਬਕ ਪਿਛਲੇ ਵਰ੍ਹੇ ਸਮਾਰਟ ਫੋਨ ਵਰਤੋਂਕਾਰਾਂ ਨੇ ਵੱਖ-ਵੱਖ ਐਪ ਸਟੋਰਾਂ ਤੋਂ ਸਵਾ ਸੱਤ ਲੱਖ ਐਪਸ ਡਾਊਨਲੋਡ ਕੀਤੀਆਂ ਗਈਆਂ ਹਨ। ਐਂਡਰਾਇਡ ਅਪਰੇਟਿੰਗ ਸਿਸਟਮ ਦਿਨੋਂ-ਦਿਨ ਹੋਰਨਾਂ ਦੇ ਮੁਕਾਬਲੇ ਵਧੇਰੇ ਲੋਕਪ੍ਰਿਆ ਹੁੰਦਾ ਜਾ ਰਿਹਾ ਹੈ। ਇਸ ਦੇ ਕਈ ਕਾਰਨ ਹਨ। ਇੱਕ ਤਾਂ ਇਸ ਦਾ ਕੋਡ ਓਪਨ ਸੋਰਸ ਹੈ ਅਰਥਾਤ ਮੁਫ਼ਤ ਵਿੱਚ ਮਿਲ ਜਾਂਦਾ ਹੈ। ਦੂਜੇ ਸ਼ਬਦਾਂ ਵਿੱਚ ਇਸ ਦੀ ਵਰਤੋਂ ਕੋਈ ਵੀ ਮੁਫ਼ਤ ਵਿੱਚ ਕਰ ਸਕਦਾ ਹੈ। ਇਸ ਦੀਆਂ ਕਈ ਐਪਸ ਦੇ ਕੋਡ ਵੀ ਨੈੱਟ ’ਤੇ ਮੁਫ਼ਤ ਉਪਲਬਧ ਹਨ ਜਿਨ੍ਹਾਂ ਨੂੰ ਡਾਊਨਲੋਡ ਕਰਕੇ, ਉਸ ਵਿੱਚ ਲੋੜੀਂਦੀ ਤਬਦੀਲੀ ਕਰਕੇ ਆਪਣੀ ਨਵੀਂ ਐਪ ਤਿਆਰ ਕੀਤੀ ਜਾ ਸਕਦੀ ਹੈ। ਐਂਡਰਾਇਡ ਪ੍ਰੋਗਰਾਮਰ ਸਿਰਫ਼ 2500 ਰੁਪਏ ਰਜਿਸਟਰੇਸ਼ਨ ਫ਼ੀਸ ਭਰ ਕੇ ਗੂਗਲ ਪਲੇਅ ਸਟੋਰ ’ਤੇ ਆਪਣਾ ਖਾਤਾ ਖੋਲ੍ਹ ਕੇ ਐਪਸ ਅੱਪਲੋਡ ਕਰ ਸਕਦਾ ਹੈ। ਇਨ੍ਹਾਂ ਐਪਸ ਨੂੰ ਪੂਰੀ ਦੁਨੀਆਂ ਤਕ ਪਹੁੰਚਾਉਣ ਲਈ ਗੂਗਲ ਨੇ ਕਈ ਯੋਜਨਾਵਾਂ ਬਣਾਈਆਂ ਹੋਈਆਂ ਹਨ। ਐਂਡਰਾਇਡ ਐਪਸ ਫਾਈਲਾਂ (ਏਪੀਕੇ) ਨੂੰ ਵੈੱਬਸਾਈਟ, ਈ-ਮੇਲ, ਡੈਟਾ ਕੇਬਲ ਅਤੇ ਬਲੂ-ਟੁੱਥ ਆਦਿ ਰਾਹੀਂ ਕਿਸੇ ਤਕ ਵੀ ਭੇਜਿਆ ਜਾ ਸਕਦਾ ਹੈ।
ਗੂਗਲ ਪਲੇਅ ਸਟੋਰ ’ਤੇ ਚੋਟੀ ਦੀਆਂ ਮੁਫ਼ਤ ਐਪਸ ’ਚ ਵਟਸ ਐਪ, ਫੇਸਬੁਕ, ਮੈਕਸ ਪਲੇਅਰ, ਫੇਸਬੁਕ ਮੈਸੇਜ ਅਤੇ ਯੂਸੀ ਬ੍ਰਾਊਜ਼ਰ ਆਦਿ ਪ੍ਰਮੁੱਖ ਹਨ। ਇਸੇ ਤਰ੍ਹਾਂ ਪਾਵਰ-ਐਮਪ, ਸਵਿਫਟ ਕੀ-ਬੋਰਡ, ਨੌਵਾਂ ਲਾਂਚਰ, ਟੈਂਪਲ ਰਨ ਆਦਿ ਪੇਅਡ ਅਰਥਾਤ ਮੁੱਲ ਦੀਆਂ ਐਪਸ ਸ਼੍ਰੇਣੀ ’ਚ ਮੁਹਰਲੀ ਕਤਾਰ ’ਚ ਆਉਂਦੀਆਂ ਹਨ। ਐਪ ਸਟੋਰ ਦੀ ਸ਼ੁਰੂਆਤ ਜੁਲਾਈ 2008 ਵਿੱਚ ਸਿਰਫ਼ 800 ਐਪਸ ਨਾਲ ਹੋਈ। ਇਸ ’ਤੇ ਸਤੰਬਰ 2009 ਤਕ 85,000 ਅਤੇ ਸਤੰਬਰ 2012 ਤਕ 7 ਲੱਖ ਐਪਸ ਉਪਲਬਧ ਸਨ। ਜੂਨ 2013 ਤਕ ਇਸ ’ਤੇ 9 ਲੱਖ ਦੇ ਕਰੀਬ ਐਪਸ ਪਾਈਆਂ ਗਈਆਂ। ਅੱਜ ਐਂਡਰਾਇਡ ਦੇ ਸਸਤੇ ਫੋਨਾਂ ਅਤੇ ਮੁਫ਼ਤ ਅਪਰੇਟਿੰਗ ਸਿਸਟਮ ਕਾਰਨ ਐਂਡਰਾਇਡ ਵਰਤੋਂਕਾਰਾਂ ਦੀ ਗਿਣਤੀ ਤੇਜ਼ੀ ਨਾਲ ਵਧ ਰਹੀ ਹੈ। ਇਸ ਨਾਲ ਨਵੀਆਂ ਐਪਸ ਤਿਆਰ ਕਰਨ ਵਾਲੇ ਖੋਜਕਾਰਾਂ ਨੂੰ ਇੱਕ ਨਵਾਂ ਹੁਲਾਰਾ ਮਿਲਿਆ ਹੈ।

No comments :

Post a Comment

Note: Only a member of this blog may post a comment.

ਮੋਬਾਈਲ ਦੀ ਰਫ਼ਤਾਰ ਧੀਮੀ ਹੋਣ ’ਤੇ ਕੀ ਕੀਤਾ ਜਾਵੇ (20150116)

ਸਮਾਰਟ ਫੋਨ ਵਿੱਚ ਹੱਦੋਂ ਵੱਧ ਜਾਂ ਬੇਲੋੜੀਆਂ ਐਪਸ ਪਾਉਣ ਨਾਲ ਇਹ ਸੁਸਤ ਹੋ ਸਕਦਾ ਹੈ। ਮੋਬਾਈਲ  ਦੀ ਸੁਸਤੀ ਦੇ ਹੋਰ ਵੀ ਕਈ ਕਾਰਨ ਹੋ ਸਕਦੇ ਹਨ ਜਿਵੇਂ ਕਿ- ਰੈਮ (ਅੰਦਰੂਨੀ ਮੈਮਰੀ) ਦਾ ਘੱਟ ਹੋਣਾ, ਇੱਕੋ ਵੇਲੇ ਕਈ ਐਪਸ ਦਾ ਚਾਲੂ ਹੋਣਾ, ਪ੍ਰਭਾਵਸ਼ਾਲੀ ਚਲਦੇ-ਫਿਰਦੇ ਵਾਲ ਪੇਪਰ ਲਗਾਉਣਾ ਆਦਿ।
ਮੋਬਾਈਲ ਦੀ ਰਫ਼ਤਾਰ ਵਧਾਉਣ ਲਈ ਦਸ ਨੁਕਤੀ ਫਾਰਮੂਲਾ ਘੜਿਆ ਗਿਆ ਹੈ। ਇਸ ਫਾਰਮੂਲੇ ਨੂੰ ਅਪਣਾ ਕੇ ਆਪਣੇ ਮੋਬਾਈਲ ਨੂੰ ਚੁਸਤ ਦਰੁਸਤ ਤੇ ਤੇਜ਼ ਤਰਾਰ ਬਣਾਇਆ ਜਾ ਸਕਦਾ ਹੈ।
* ਜੇ ਤੁਹਾਡੇ ਮੋਬਾਈਲ ਵਿੱਚ ਐਂਡਰਾਇਡ ਦਾ ਪੁਰਾਣਾ ਸੰਸਕਰਨ ਹੈ ਤਾਂ ਇਸ ਨੂੰ ਅੱਪਡੇਟ ਕਰ ਲਓ।
* ਐਂਡਰਾਇਡ ਦੀ ਰਫ਼ਤਾਰ ਵਧਾਉਣ ਲਈ ਇਸ ਨੂੰ ਰੀਸੈੱਟ ਵੀ ਕੀਤਾ ਜਾ ਸਕਦਾ ਹੈ। ਧਿਆਨ ਰਹੇ ਕਿ ਮੋਬਾਈਲ ਨੂੰ ਰੀਸੈੱਟ ਕਰਨ ਤੋਂ ਪਹਿਲਾਂ ਸੰਪਰਕ ਨੰਬਰ, ਜ਼ਰੂਰੀ ਸੂਚਨਾਵਾਂ, ਬ੍ਰਾਊਜ਼ਰ ਪਾਸਵਰਡ ਆਦਿ ਨੂੰ ਸੁਰੱਖਿਅਤ ਕਰ ਲਓ।
* ਅੰਦਰੂਨੀ ਐੱਸਡੀ ਕਾਰਡ ਦੀ ਮੈਮਰੀ ਸਪੇਸ ਦਾ ਜਾਇਜ਼ਾ ਲਓ। ਜੇ ਇਹ ਘੱਟ ਹੈ ਤਾਂ ਤਸਵੀਰਾਂ, ਆਡੀਓ ਅਤੇ ਵੀਡੀਓ ਆਦਿ ਫਾਈਲਾਂ ਨੂੰ ਬਾਹਰੀ ਐੱਸਡੀ ਕਾਰਡ ਵਿੱਚ ਪਾ ਦਿਓ।
* ਸਿਰਫ਼ ਕੰਮ ਦੀਆਂ ਐਪਸ ਹੀ ਵਰਤੋ। ਫ਼ਾਲਤੂ ਐਪਸ ਨੂੰ ਹਟਾ ਦਿਓ।
* ਕਈ ਵਾਰ ਮੋਬਾਈਲ ’ਤੇ ਕਈ ਐਪਸ ਆਪਣੇ-ਆਪ ਚੱਲਣੀਆਂ ਸ਼ੁਰੂ ਹੋ ਜਾਂਦੀਆਂ ਹਨ। ਇਸ ਨਾਲ ਪ੍ਰੋਸੈੱਸਰ ਦਾ ਕੰਮ ਵੰਡਿਆ ਜਾਂਦਾ ਹੈ ਤੇ ਇਹ ਸੁਸਤ ਹੋ ਜਾਂਦਾ ਹੈ। ਪਰਦੇ ਪਿੱਛੇ ਚੱਲਣ ਵਾਲੀਆਂ ਐਪਸ ਨੂੰ ਬੰਦ ਕਰਨ ਲਈ ਸੈਟਿੰਗਜ਼, ਐਪਸ, ਐਪ ਦੀ ਚੋਣ, ਫੋਰਸ ਸਟੋਪ ਰਸਤੇ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਉਂਜ ਮੈਮਰੀ ਸਪੇਸ ਨੂੰ ਮੁਕਤ ਕਰਨ ਲਈ ‘ਆਟੋ ਟਾਸਕ ਕਿੱਲਰ’ ਵਰਗੇ ਕਈ ਤੀਜੀ ਧਿਰ ਦੇ ਪ੍ਰੋਗਰਾਮ ਵੀ ਮੌਜੂਦ ਹਨ।
* ਕਈ ਵਾਰ ਕੋਈ ਨਵੀਂ ਐਪ ਮੋਬਾਈਲ ਵਿੱਚ ਯੋਗ ਤਰੀਕੇ ਨਾਲ ਇੰਸਟਾਲ ਨਹੀਂ ਹੁੰਦੀ ਜਾਂ ਫਿਰ ਚੱਲਣ ਸਮੇਂ ਮੁਸ਼ਕਲ ਪੇਸ਼ ਕਰਦੀ ਹੈ। ਇਨ੍ਹਾਂ ਦੋਹਾਂ ਸਥਿਤੀਆਂ ’ਚ ਮੋਬਾਈਲ ਦੀ ਰਫ਼ਤਾਰ ਘੱਟ ਸਕਦੀ ਹੈ। ਇਸ ਤੋਂ ਟਾਲਾ ਵੱਟਣ ਦਾ ਇੱਕ ਨੁਕਤਾ ਹੈ ਕਿ ਫੋਨ ਨੂੰ ਮੁੜ ਚਾਲੂ (ਰੀਸਟਾਰਟ) ਕਰ ਲਓ।
* ‘ਰੂਟਿੰਗ’ ਹਾਲਾਂ ਕਿ ਬਿਪਤਾ ਪੂਰਨ ਪ੍ਰਕਿਰਿਆ ਹੈ ਪਰ ਇਸ ਨਾਲ ਮੋਬਾਈਲ ਦੇ ਪ੍ਰੋਸੈੱਸਰ ਦੀ ਰਫ਼ਤਾਰ ਵਧਾ ਕੇ ਇਸ ਦੀ ਸੁਸਤੀ ਨੂੰ ਦੂਰ ਕੀਤਾ ਜਾ ਸਕਦਾ ਹੈ। ਇਹ ਪ੍ਰਕਿਰਿਆ ਕਾਹਲੀ ਵਿੱਚ ਜਾਂ ਪੋਲੇ ਪੈਰੀਂ ਨਹੀਂ ਅਪਣਾਉਣੀ ਚਾਹੀਦੀ। ਮੋਬਾਈਲ  ਨੂੰ ‘ਸੂਤ’ ਕਰਨ ਦਾ ਇਹ ਅੰਤਲਾ ਹਥਿਆਰ ਹੈ।
* ਕਈ ਲੋਕ ਆਪਣੇ ਮੋਬਾਈਲ  ਦੀ ਸਕਰੀਨ ’ਤੇ ਕਲਾਕ, ਗੂਗਲ ਸਰਚ ਅਤੇ ਮਿਊਜ਼ਿਕ ਪਲੇਅਰ ਆਦਿ ਦੇ ਵੀਜੇਟਸ (Widgets) ਫਬਾ ਲੈਂਦੇ ਹਨ। ਘੁੰਮਦੇ ਫਿਰਦੇ ਵਾਲਪੇਪਰ ਜਾਂ ਹੋਮ ਸਕਰੀਨ ਲਾਉਣ ਨਾਲ ਵੀ ਗੜਬੜ ਹੋ ਸਕਦੀ ਹੈ। ਇਸ ਲਈ ਵੀਜੇਟਸ ਅਤੇ ਵਾਲਪੇਪਰਾਂ ਦੀ ਵਰਤੋਂ ਘੱਟ ਤੋਂ ਘੱਟ ਕਰੋ। ਜੇ ਵਾਲਪੇਪਰ ਲਗਾਉਣਾ ਵੀ ਹੋਵੇ ਤਾਂ ਸਥਿਰ (Static) ਵਾਲਪੇਪਰ ਹੀ ਵਰਤੋ।
* ਮੋਬਾਈਲ ਦੀ ਵਿਸ਼ੇਸ਼ ਕਿਸਮ ਦੀ ਕੈਸ਼ ਮੈਮਰੀ ਨੂੰ ਸਾਫ਼-ਸੁਥਰਾ ਅਤੇ ਨਿਰੋਗ ਬਣਾਉਣ ਲਈ ‘ਕਲੀਨਰ’ ਅਤੇ ‘ਡੀਫਰੈਗਮੈਂਟਰ’ ਵਰਤੇ ਜਾ ਸਕਦੇ ਹਨ। ਇਸ ਉਦੇਸ਼ ਲਈ ਤੀਜੀ ਧਿਰ ਦੇ ਵਨ ਟੈਪ ਕਲੀਨਰ ਅਤੇ ਟੋਟਲ ਡੀਫਰੈਗ ਆਦਿ ਐਪਸ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ।
* ਘੱਟ ਜਾਂ ਕਦੇ-ਕਦਾਈਂ ਵਰਤੀਆਂ ਜਾਣ ਵਾਲੀਆਂ ਐਪਸ ਦੀ ਜਗ੍ਹਾ ਬਦਲਣ ਨਾਲ ਮੋਬਾਈਲ ਦੀ ਰਫ਼ਤਾਰ ਵੱਧ ਜਾਂਦੀ ਹੈ। ਅਜਿਹੀਆਂ ਐਪਸ ਨੂੰ ਮੋਬਾਈਲ ਮੈਮਰੀ ਤੋਂ ਅੰਦਰੂਨੀ ਐੱਸਡੀ ਕਾਰਡ ਵਿੱਚ ਘੱਲਿਆ ਜਾ ਸਕਦਾ ਹੈ। ਇਸ ਮੰਤਵ ਲਈ ਸੈਟਿੰਗਜ਼ ਵਿੱਚੋਂ ਐਪਸ ਦੀ ਚੋਣ ਕਰੋ। ਲੋੜੀਂਦੀ ਐਪ ਚੁਣ ਕੇ ‘ਮੂਵ ਟੂ ਇੰਟਰਨਲ ਐੱਸਡੀ ਕਾਰਡ’ ’ਤੇ ਟੱਚ ਕਰੋ।

No comments :

Post a Comment

Note: Only a member of this blog may post a comment.

ਪੰਜਾਬੀ ਕੰਪਿਊਟਰ ਨੇ ਸਿਰਜਿਆ ਨਵਾਂ ਇਤਿਹਾਸ (ਨਵਾਂ ਜ਼ਮਾਨਾ/20150114)

ਬੀਤੇ ਵਰ੍ਹੇ ਦੇ ਪੰਜਾਬੀ ਕੰਪਿਊਟਰ ਦਾ ਲੇਖਾ-ਜੋਖਾ
ਬੀਤੇ ਵਰ੍ਹੇ ਪੰਜਾਬੀ ਕੰਪਿਊਟਰ ਖੋਜਕਾਰਾਂ ਵੱਲੋਂ ਇੱਕ ਦਰਜਨ ਪੰਜਾਬੀ ਸਾਫਟਵੇਅਰਾਂ ਦਾ ਵਿਕਾਸ ਕੀਤਾ ਗਿਆ। ਇਨ੍ਹਾਂ ਵਿਚੋਂ ਪੰਜਾਬੀ ਯੂਨੀਵਰਸਿਟੀ ਦੇ 'ਪੰਜਾਬੀ ਪੀਡੀਆ'  ਸਮੇਤ 'ਸੋਧਕ', 'ਯੂਨੀ-ਟਾਈਪ', 'ਜੀ-ਲਿਪੀਕਾ', 'ਸਾਫ਼ਟਵੇਅਰ ਸੀਡੀ' ਅਤੇ 'ਵਰਡ ਪੰਜਾਬੀ ਪਲੱਗ-ਇਨ' ਦਾ ਨਾਂ ਜ਼ਿਕਰਯੋਗ ਹੈ।
ਪੰਜਾਬੀ ਪੀਡੀਆ ਇੱਕ ਆਨ-ਲਾਈਨ ਵਿਸ਼ਵਕੋਸ਼ ਹੈ। ਇਸ ਦਾ ਵਿਕਾਸ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਡਾ. ਜਸਪਾਲ ਸਿੰਘ ਦੀ ਨਿੱਜੀ ਦਿਲਚਸਪੀ ਸਦਕਾ ਵਿੱਕੀਪੀਡੀਆ ਦੀ ਤਰਜ਼ 'ਤੇ ਕੀਤਾ ਗਿਆ ਹੈ। ਯੂਨੀਵਰਸਿਟੀ ਦੇ ਰਜਿਸਟਰਾਰ ਡਾ. ਦੇਵਿੰਦਰ ਸਿੰਘ ਦੀ ਯੋਗ ਅਗਵਾਈ ਸਦਕਾ ਇਸ ਪ੍ਰੋਜੈਕਟ ਤਹਿਤ ਯੂਨੀਵਰਸਿਟੀ ਦੀਆਂ ਅਤੇ ਬਾਹਰਲੀਆਂ ਚੋਣਵੀਂਆਂ ਲਿਖਤਾਂ, ਸੰਦਰਭ ਕੋਸ਼ਾਂ, ਪਰਿਭਾਸ਼ਿਕ ਸ਼ਬਦਾਵਲੀਆਂ ਆਦਿ ਨੂੰ ਵੈੱਬਸਾਈਟ www.punjabipedia.org 'ਤੇ ਇੰਦਰਾਜ ਰੂਪ ਵਿਚ ਪਾਉਣ ਦਾ ਕੰਮ ਨਿਰੰਤਰ ਜਾਰੀ ਹੈ। ਪੰਜਾਬੀ ਪੀਡੀਆ 'ਤੇ ਹੁਣ ਤੱਕ ਕਰੀਬ ਡੇਢ ਲੱਖ ਇੰਦਰਾਜ ਉਪਲਬਧ ਹਨ ਜਿਨ੍ਹਾਂ ਦਾ ਪੰਜਾਬੀ ਪਾਠਕਾਂ ਅਤੇ ਖ਼ਾਸ ਤੌਰ 'ਤੇ ਖੋਜਾਰਥੀਆਂ, ਅਧਿਆਪਕਾਂ ਅਤੇ ਲੇਖਕਾਂ ਨੂੰ ਵੱਡਾ ਫ਼ਾਇਦਾ ਹੋ ਰਿਹਾ ਹੈ।
ਪਿਛਲੇ ਵਰ੍ਹੇ ਪੰਜਾਬੀ ਯੂਨੀਵਰਸਿਟੀ ਦੁਆਰਾ ਪੰਜਾਬੀ ਕੰਪਿਊਟਰ ਦੀ ਸਿਖਲਾਈ ਅਤੇ ਪ੍ਰਚਾਰ-ਪ੍ਰਸਾਰ ਦੇ ਮੰਤਵ ਨਾਲ ਸ਼ੁਰੂ ਕੀਤੇ ਪੰਜਾਬੀ ਕੰਪਿਊਟਰ ਸਹਾਇਤਾ ਕੇਂਦਰ ਵੱਲੋਂ ਕਰੀਬ 20 ਸਾਫਟਵੇਅਰਾਂ ਦੀ ਸੀਡੀ ਅਤੇ ਅੱਧੀ ਦਰਜਨ ਰੰਗਦਾਰ ਪੋਸਟਰ ਜਾਰੀ ਕੀਤੇ ਗਏ। ਸੀਡੀ ਵਿਚ ਦਰਜ ਸਾਫ਼ਟਵੇਅਰ ਪੰਜਾਬੀ ਫੌਂਟਾਂ, ਫੌਂਟ ਕਨਵਰਟਰ ਪ੍ਰੋਗਰਾਮ, ਗੁਰਬਾਣੀ ਸਰਚ ਇੰਜਣ, ਯੂਨੀਕੋਡ ਕੀ-ਬੋਰਡ ਲੇਆਉਟ ਆਦਿ ਨਾਲ ਸਬੰਧਿਤ ਹਨ। ਇਨ੍ਹਾਂ ਨੂੰ ਕੇਂਦਰ ਦੀ ਵੈੱਬਸਾਈਟ www.punjabicomputer.com ਜਾਂ ਯੂਨੀਵਰਸਿਟੀ ਦੇ ਕਿਤਾਬ ਘਰ ਤੋਂ ਪ੍ਰਾਪਤ ਕੀਤਾ ਜਾ ਸਕਦਾ ਹੈ।
ਯੂਨੀਵਰਸਿਟੀ ਦੇ ਪੰਜਾਬੀ ਭਾਸ਼ਾ, ਸਾਹਿਤ ਅਤੇ ਸਭਿਆਚਾਰ ਦੇ ਤਕਨੀਕੀ ਵਿਕਾਸ ਦੇ ਉੱਚਤਮ ਕੇਂਦਰ ਵੱਲੋਂ 'ਸੋਧਕ' ਨਾਂ ਦਾ ਆਨ-ਲਾਈਨ ਪ੍ਰੋਗਰਾਮ ਤਿਆਰ ਕੀਤਾ ਗਿਆ। 'ਸੋਧਕ' ਯੂਨੀਕੋਡ ਫੌਂਟ ਪਲਟਾਊ ਅਤੇ ਪੰਜਾਬੀ ਸਪੈੱਲ ਚੈੱਕਰ ਦਾ ਸੁਮੇਲ ਹੈ। ਇਸ ਵਿਲੱਖਣ ਫੌਂਟ ਕਨਵਰਟਰ ਰਾਹੀਂ ਪੰਜਾਬੀ ਦੇ ਕਿਸੇ ਅਗਿਆਤ ਫੌਂਟ 'ਚ ਸੰਜੋਈ ਸਾਮੱਗਰੀ ਦਾ ਯੂਨੀਕੋਡ ਪਰਿਵਰਤਨ ਕਰਨਾ ਸੰਭਵ ਹੈ। ਇਹ ਪ੍ਰੋਗਰਾਮ ਪੰਜਾਬੀ ਦੇ ਸ਼ਬਦ ਜੋੜਾਂ ਦੀ ਜਾਂਚ ਕਰਦਾ ਹੈ ਤੇ ਗ਼ਲਤ ਸ਼ਬਦਾਂ ਦੇ ਸਹੀ ਸ਼ਬਦ-ਜੋੜ ਸੁਝਾਉਂਦਾ ਹੋਇਆ ਸ਼ੁੱਧ ਪੰਜਾਬੀ ਲਿਖਣ 'ਚ ਮਦਦ ਕਰਦਾ ਹੈ। ਯੂਨੀਵਰਸਿਟੀ ਦੇ ਉੱਚਤਮ ਕੇਂਦਰ ਦੇ ਡਾ. ਗੁਰਪ੍ਰੀਤ ਸਿੰਘ ਲਹਿਲ ਦੀ ਅਗਵਾਈ ਹੇਠ ਡਾ. ਤੇਜਿੰਦਰ ਸਿੰਘ ਵੱਲੋਂ ਤਿਆਰ ਕੀਤੇ ਇਸ ਪ੍ਰੋਗਰਾਮ ਨੂੰ www.punjabicomputer.com ਤੋਂ ਡਾਊਨਲੋਡ ਕਰਕੇ ਵਰਤਿਆ ਜਾ ਸਕਦਾ ਹੈ।
ਵੱਖ-ਵੱਖ ਕੀ-ਬੋਰਡ ਲੇਆਉਟ ਵਰਤ ਕੇ ਪੰਜਾਬੀ ਦੇ ਮਿਆਰੀ ਫੌਂਟ ਰਾਵੀ (ਯੂਨੀਕੋਡ) 'ਚ ਟਾਈਪ ਕਰਨ ਲਈ ਭਾਵੇਂ ਪਹਿਲਾਂ ਹੀ ਕਈ ਤਰਕੀਬਾਂ ਵਿਕਸਿਤ ਕੀਤੀਆਂ ਜਾ ਚੁੱਕੀਆਂ ਹਨ ਪਰ ਬੀਤੇ ਵਰ੍ਹੇ ਪਹਿਲਾਂ ਸਿਹਾਰੀ ਪਾਉਣ ਅਤੇ ਇੱਕ ਤੋਂ ਵੱਧ ਪ੍ਰਚਲਿਤ ਪੰਜਾਬੀ ਕੀ-ਬੋਰਡਾਂ ਨੂੰ ਵਰਤਣ ਦੇ ਮਸਲੇ ਨੂੰ ਲੈ ਕੇ ਦੋ ਵੱਖ-ਵੱਖ ਪ੍ਰੋਗਰਾਮ ਵਿਕਸਿਤ ਹੋਏ। ਪੰਜਾਬੀ ਵਿਭਾਗ ਦੇ ਡਾ. ਰਾਜਵਿੰਦਰ ਸਿੰਘ ਅਤੇ ਡਾ. ਚਰਨਜੀਤ ਸਿੰਘ ਦੁਆਰਾ ਵਿਕਸਿਤ ਕੀਤੇ 'ਜੀ-ਲਿਪੀਕਾ' ਪ੍ਰੋਗਰਾਮ 'ਚ ਵੱਖ-ਵੱਖ ਕੀ-ਬੋਰਡਾਂ ਰਾਹੀਂ ਯੂਨੀਕੋਡ 'ਚ ਲਿਖਣ ਦੀ ਵਿਵਸਥਾ ਦੇ ਨਾਲ-ਨਾਲ ਸਤਲੁਜ ਫੌਂਟ 'ਚ ਟਾਈਪ ਕਰਨ ਦੀ ਸਮੱਸਿਆ ਦਾ ਹੱਲ ਕੱਢਿਆ ਗਿਆ ਹੈ। ਇਸ ਪ੍ਰੋਗਰਾਮ ਰਾਹੀਂ ਅਸੀਸ ਜਾਂ ਅਨਮੋਲ ਲਿਪੀ ਰਾਹੀਂ ਸਤਲੁਜ ਫੌਂਟ ਚ ਟਾਈਪ ਕੀਤਾ ਜਾ ਸਕਦਾ ਹੈ ਤੇ ਇਹ ਹਰੇਕ ਵਿੰਡੋਜ਼ 'ਤੇ ਚੱਲਣ ਦੇ ਸਮਰੱਥ ਹੈ।
ਯੂਨੀਵਰਸਿਟੀ ਦੇ ਉੱਚਤਮ ਕੇਂਦਰ ਵੱਲੋਂ ਡਾ. ਗੁਰਪ੍ਰੀਤ ਸਿੰਘ ਲਹਿਲ ਦੀ ਅਗਵਾਈ ਹੇਠ ਸ੍ਰੀ ਅੰਕੁਰ ਰਾਣਾ ਦੁਆਰਾ ਬਣਾਏ 'ਯੂਨੀ-ਟਾਈਪ' 'ਚ ਫੋਨੈਟਿਕ (ਅਨਮੋਲ ਲਿਪੀ), ਰਮਿੰਗਟਨ (ਅਸੀਸ) ਅਤੇ ਇਨਸਕਰਿਪਟ ਕੀ-ਬੋਰਡ ਵਰਤ ਕੇ ਯੂਨੀਕੋਡ (ਰਾਵੀ) 'ਚ ਟਾਈਪ ਕਰਨ ਦੀ ਵਿਵਸਥਾ ਹੈ। ਇਸ ਵਿਲੱਖਣ ਪ੍ਰੋਗਰਾਮ ਦੀ ਸਕਰੀਨ 'ਤੇ ਵੱਖ-ਵੱਖ ਕੀ-ਬੋਰਡਾਂ ਦੇ ਦ੍ਰਿਸ਼ ਵੇਖਣ ਅਤੇ ਸਪੈੱਲ ਚੈੱਕ ਕਰਨ ਦੇ ਲਿੰਕ ਵੀ ਦਿਖਾਏ ਗਏ ਹਨ। ਇਸ ਨੂੰ ਮੁਫ਼ਤ 'ਚ www.punjabicomputer.com (ਲਿੰਕ: ਡਾਊਨਲੋਡ---ਕੀ-ਬੋਰਡ ਅਤੇ ਟਾਈਪਿੰਗ---ਯੂਨੀ-ਟਾਈਪ) ਤੋਂ ਡਾਊਨਲੋਡ ਕਰਕੇ ਵਰਤਿਆ ਜਾ ਸਕਦਾ ਹੈ। 
ਯੂਨੀਵਰਸਿਟੀ ਦੇ ਉਕਤ ਅਦਾਰੇ ਵੱਲੋਂ 'ਕੁਸ਼ਲ ਫੌਂਟ ਕਨਵਰਟਰ' ਪ੍ਰੋਗਰਾਮ ਦਾ ਵਿਕਾਸ ਵੀ ਪਿਛਲੇ ਵਰ੍ਹੇ ਕੀਤਾ ਗਿਆ। ਇਹ ਪ੍ਰੋਗਰਾਮ ਕਿਸੇ ਅਣਪਛਾਤੇ ਜਾਂ ਨਵੇਂ ਫੌਂਟ 'ਚ ਤਿਆਰ ਕੀਤੀ ਸਮੱਗਰੀ ਨੂੰ ਠੀਕ ਤਰ੍ਹਾਂ ਪੜ੍ਹਨ, ਫੌਂਟ ਦਾ ਪਤਾ ਲਗਾਉਣ ਅਤੇ ਉਸ ਨੂੰ ਮਿਆਰੀ ਯੂਨੀਕੋਡ 'ਚ ਤਬਦੀਲ ਕਰਨ ਲਈ ਜਾਦੂ ਦੀ ਛੜੀ ਦਾ ਕੰਮ ਕਰਦਾ ਹੈ। ਇਹ ਕਿਸੇ ਪੀਡੀਐਫ ਫਾਈਲ ਰਾਹੀਂ ਪ੍ਰਾਪਤ ਸਮੱਗਰੀ ਦਾ ਫੌਂਟ ਬਦਲਣ ਲਈ ਬਿਹਤਰੀਨ ਟੂਲ ਹੈ ਜਿਸ ਨੂੰ ਵੈੱਬਸਾਈਟ www.learnpunjabi.com (ਲਿੰਕ: Online resources) ਤੋਂ ਡਾਊਨਲੋਡ ਕੀਤਾ ਜਾ ਸਕਦਾ ਹੈ।
ਬੀਤੇ ਵਰ੍ਹੇ ਦੇ ਅੰਤ 'ਚ ਯੂਨੀਵਰਸਿਟੀ ਦੇ ਕੰਪਿਊਟਰ ਸਾਇੰਸ ਵਿਭਾਗ ਦੇ ਡਾ. ਧਰਮਵੀਰ ਸ਼ਰਮਾ ਨੇ ਮਾਈਕਰੋਸਾਫ਼ਟ ਵਰਡ ਦਾ ਪੰਜਾਬੀ ਪਲੱਗ-ਇਨ ਤਿਆਰ ਕਰਕੇ ਇੱਕ ਨਿਵੇਕਲੀ ਪਹਿਲਕਦਮੀ ਕੀਤੀ। ਪੰਜਾਬੀ ਸਾਫ਼ਟਵੇਅਰ ਵਿਕਾਸਕਰਤਾ ਅਕਸਰ ਵਿੰਡੋਜ਼ ਅਤੇ ਐੱਮਐੱਸ ਵਰਡ ਨਾਲ ਵੱਖਰੇ ਤੌਰ ਤੇ ਪਲੱਗ-ਇਨ ਸੁਵਿਧਾਵਾਂ ਜੋੜਨ ਦੀ ਬਜਾਏ ਵੱਖਰੇ ਤੇ ਨਿਵੇਕਲੇ ਸਾਫ਼ਟਵੇਅਰ ਤਿਆਰ ਕਰਨ ਨੂੰ ਤਰਜੀਹ ਦਿੰਦੇ ਆਏ ਹਨ ਪਰ ਹੁਣ ਇੱਕ ਨਵੀਨ ਧਾਰਨਾ ਸਾਹਮਣੇ ਆਈ ਹੈ। ਵੈੱਬਸਾਈਟ www.dveer.in ਤੋਂ ਪਲੱਗ-ਇਨ ਪ੍ਰੋਗਰਾਮ ਇੰਸਟਾਲ ਕਰਨ ਉਪਰੰਤ ਇਹ ਤੁਹਾਡੇ ਕੰਪਿਊਟਰ ਦੇ ਐੱਮਐੱਸ ਵਰਡ 'ਚ ਆਪਣੇ ਆਪ ਜੁੜ ਜਾਂਦਾ ਹੈ। ਵਰਡ ਦੇ ਇੱਕ ਵੱਖਰੇ ਟੈਬ/ਰੀਬਨ 'ਚ ਨਜ਼ਰ ਆਉਣ ਵਾਲਾ ਇਹ ਪ੍ਰੋਗਰਾਮ ਸ਼ਬਦ ਕੋਸ਼, ਸਮ-ਅਰਥੀ ਕੋਸ਼ ਅਤੇ ਸਪੈੱਲ ਚੈੱਕਰ ਦੀ ਸੁਵਿਧਾ ਪ੍ਰਦਾਨ ਕਰਵਾਉਂਦਾ ਹੈ।
ਪੰਜਾਬੀ ਯੂਨੀਵਰਸਿਟੀ ਤੋਂ ਇਲਾਵਾ ਕਈ ਜਨਤਕ ਅਦਾਰਿਆਂ ਤੇ ਵਿਅਕਤੀਆਂ ਨੇ ਨਿੱਜੀ ਦਿਲਚਸਪੀ ਲੈ ਕੇ ਸ਼ਲਾਘਾਯੋਗ ਕੰਮ ਕੀਤੇ ਹਨ। ਸਕੇਪ ਪੰਜਾਬ (www.scappunjab.com) ਨਾਂ ਦੇ ਅਦਾਰੇ ਨੇ ਆਪਣੀ ਵੈੱਬਸਾਈਟ 'ਤੇ ਆਨ ਲਾਈਨ ਮੈਗਜ਼ੀਨ, ਕੀ-ਬੋਰਡ ਡਰਾਈਵਰ, ਇਜ਼ੀ ਟਾਈਪਿੰਗ ਟਿਊਟਰ, ਫੌਂਟ ਕਨਵਰਟਰ ਆਦਿ ਮੁਹੱਈਆ ਕਰਵਾਏ ਹਨ। ਇਸੇ ਤਰ੍ਹਾਂ ਇੱਕ ਤਕਨੀਕੀ ਕਾਲਜ ਦੇ ਵਿਦਿਆਰਥੀ ਗੁਰਸੇਵਕ ਸਿੰਘ ਤੇ ਉਸ ਦੇ ਸਾਥੀਆਂ ਨੇ ਅੰਗਰੇਜ਼ੀ-ਪੰਜਾਬੀ ਟੌਪਿਕ ਡਿਕਸ਼ਨਰੀ ਤਿਆਰ ਕੀਤੀ ਹੈ।
ਆਸ ਹੈ ਕਿ ਇਸ ਵਰ੍ਹੇ ਪੰਜਾਬੀ ਕੰਪਿਊਟਰ ਨਵੇਂ ਦਿਸਹੱਦੇ ਪਾਰ ਕਰੇਗਾ ਤੇ ਮਾਂ-ਬੋਲੀ ਦੇ ਵਿਕਾਸ 'ਚ ਮੋਹਰੀ ਭੂਮਿਕਾ ਨਿਭਾਵੇਗਾ। 

No comments :

Post a Comment

Note: Only a member of this blog may post a comment.

ਵੀਡੀਓ: ਬੀਤੇ ਵਰ੍ਹੇ ਦੇ ਪੰਜਾਬੀ ਕੰਪਿਊਟਰ ਦਾ ਲੇਖਾ-ਜੋਖਾ

No comments :

Post a Comment

Note: Only a member of this blog may post a comment.

‘ਐਪ’ ਰਾਹੀਂ ‘ਐਪਸ’ ਦਾ ਆਦਾਨ-ਪ੍ਰਦਾਨ (20150109)

ਗੂਗਲ ਪਲੇਅ ਸਟੋਰ ’ਤੇ ਹਜ਼ਾਰਾਂ ਐਪਸ ਮੌਜੂਦ ਹਨ। ਇਨ੍ਹਾਂ ਵਿੱਚੋਂ ਤੁਸੀਂ ਆਪਣੀ ਲੋੜ ਅਨੁਸਾਰ ਐਪ ਡਾਊਨਲੋਡ ਕਰਕੇ ਵਰਤ ਸਕਦੇ ਹੋ।
ਸਾਫਟਵੇਅਰ ਵਿਕਾਸਕਾਰਾਂ ਨੇ ਕਈ ਐਪਸ ਪਲੇਅ ਸਟੋਰ ’ਤੇ ਨਹੀਂ ਪਾਈਆ ਹੁੰਦੀਆਂ। ਜਿਸ ਕਾਰਨ ਇਨ੍ਹਾਂ ਨੂੰ ਪ੍ਰਾਪਤ ਕਰਨ ’ਚ ਮੁਸ਼ਕਿਲ ਪੇਸ਼ ਆਉਂਦੀ ਹੈ। ਕਈ ਵਾਰ ਅਜਿਹੀਆਂ ਐਪਸ (ਦੂਜੀਆਂ) ਵੈੱਬਸਾਈਟਾਂ ’ਤੇ ਉਪਲਬਧ ਹੋ ਸਕਦੀਆਂ ਹਨ।
ਜੇ ਤੁਹਾਡੇ ਮਤਲਬ ਦੀ ਕੋਈ ਐਪ ਇੰਟਰਨੈੱਟ ਪਲੇਅ ਸਟੋਰ ਜਾਂ ਕਿਸੇ ਹੋਰ ਵੈੱਬਸਾਈਟ ’ਤੇ ਉਪਲਬਧ ਨਹੀਂ ਤਾਂ ਉਸ ਨੂੰ ਦੂਜੇ ਦੇ ਮੋਬਾਈਲ ਫੋਨ ਤੋਂ ਸਿੱਧਾ ਪ੍ਰਾਪਤ ਕੀਤਾ ਜਾ ਸਕਦਾ ਹੈ। ਅਜਿਹੀਆਂ ਐਪਸ ਦਾ ਆਦਾਨ-ਪ੍ਰਦਾਨ ਬਲ਼ੂ-ਟੁੱਥ ਰਾਹੀਂ ਕੀਤਾ ਜਾ ਸਕਦਾ ਹੈ। ਕਈ ਲੋਕ ਮੋਬਾਈਲ ਨੂੰ ਡਾਟਾ ਕੇਬਲ ਰਾਹੀਂ ਕੰਪਿਊਟਰ ਨਾਲ ਜੋੜ ਕੇ ਪਹਿਲਾਂ ਐਪ ਨੂੰ ਕੰਪਿਊਟਰ ਵਿੱਚ ਸੇਵ ਕਰ ਲੈਂਦੇ ਹਨ ਤੇ ਫਿਰ ਦੂਜੇ ਫੋਨ ’ਚ ਭੇਜ ਦਿੰਦੇ ਹਨ।
ਮੋਬਾਈਲ ਐਪਸ ਨੂੰ ਇੱਕ ਦੂਜੇ ਨਾਲ ਸਾਂਝਾ ਕਰਨ ਦਾ ਇੱਕ ਸੌਖਾ ਇਲਾਜ ਹੈ- ਏਪੀਕੇ ਐਕਸਟ੍ਰੈਕਟਰ (apk 5xtractor)। ਇਹ ਇੱਕ ਵਿਸ਼ੇਸ਼ ਪ੍ਰੋਗਰਾਮ ਹੈ ਜਿਸ ਨੂੰ ਗੂਗਲ ਪਲੇਅ ਸਟੋਰ ਤੋਂ ਡਾਊਨਲੋਡ ਕੀਤਾ ਜਾ ਸਕਦਾ ਹੈ।
ਤੁਹਾਡੇ ਮੋਬਾਈਲ ਵਿੱਚ ਮੌਜੂਦ ਕਿਸੇ ਐਪ ਦੀ ਸਾਂਝਦਾਰੀ ਕਰਨ ਲਈ ਇਹ ਇੱਕ ਸੰਜੀਵਨੀ ਬੂਟੀ ਹੈ। ਇਹ ਇੱਕ ਮਾਤਰ ਐਪ ਐਕਸਪਲੋਰਰ ਹੈ ਜਿਸ ਦੀ ਮਦਦ ਨਾਲ ਤੁਸੀਂ ਆਪਣੀਆਂ ਐਪਸ ਨੂੰ ਬਲੂ-ਟੁੱਥ, ਵਟਸ-ਐਪ ਅਤੇ ਈ-ਮੇਲ ਆਦਿ ਰਾਹੀਂ ਦੂਜੇ ਫੋਨ ਵਿੱਚ ਭੇਜ ਸਕਦੇ ਹੋ। ਐਪਸ ਨੂੰ ਬਾਹਰ ਕੱਢ (Extract) ਕਰ ਕੇ ਅੰਦਰੂਨੀ ਐੱਸਡੀ ਕਾਰਡ ਵਿੱਚ ਸੇਵ ਵੀ ਕੀਤਾ ਜਾ ਸਕਦਾ ਹੈ।
ਐਪ ਭੇਜਣਾ
ਐਪ ਦੂਜੇ ਫੋਨ ਵਿੱਚ ਬਲੂ-ਟੁੱਥ, ਵਟਸ ਐਪ ਜਾਂ ਈ-ਮੇਲ ਆਦਿ ਰਾਹੀਂ ਭੇਜਣ ਲਈ ਹੇਠਾਂ ਦਿੱਤੇ ਕੰਮ ਕਰੋ:
* ਏਪੀਕੇ ਐਕਸਟ੍ਰੈਕਟਰ ਖੋਲ੍ਹੋ। ਇਹ ਤੁਹਾਨੂੰ ਮੋਬਾਈਲ ਵਿੱਚਲੀਆਂ ਸਾਰੀਆਂ ਐਪਸ, ਇੱਥੋਂ ਤਕ ਕਿ ਇਹ ਖ਼ੁਦ ਨੂੰ ਵੀ ਇੱਕ ਸੂਚੀ ਵਿੱਚ ਦਿਖਾਏਗਾ।
* ਜਿਹੜੀ ਐਪ ਨੂੰ ਭੇਜਣਾ ਚਾਹੁੰਦੇ ਹੋ ਉਸ ਉੱਤੇ ਥੋੜ੍ਹੀ ਦੇਰ ਟੱਚ ਕਰਕੇ ਰੱਖੋ।
* ਤਿੰਨ ਵਿਕਲਪ ਐਕਸਟ੍ਰੈਕਟਰ ਏਪੀਕੇ, ਸੈਂਡ ਏਪੀਕੇ ਅਤੇ ਡਿਲੀਟ ਐਪ ਨਜ਼ਰ ਆਉਣਗੇ।
* ਸੈਂਡ ਏਪੀਕੇ ਦੀ ਚੋਣ ਕਰੋ।
* ਹੁਣ ਏਪੀਕੇ ਐਪ ਨੂੰ ਦੂਜੇ ਫੋਨ ਤਕ ਭੇਜਣ ਦਾ ਮਾਧਿਅਮ (ਜਿਵੇਂ ਕਿ ਬਲੂ-ਟੁੱਥ ਆਦਿ) ਚੁਣੋ।
* ਬਲੂ-ਟੁੱਥ ਰਾਹੀਂ ਭੇਜਣ ਦੀ ਸਥਿਤੀ ਵਿੱਚ ਮੋਬਾਈਲ ਪਹਿਲਾਂ ਤੁਹਾਡੇ ਤੋਂ ਬਲੂ-ਟੁੱਥ ‘ਆਨ’ ਕਰਨ ਦੀ ਪ੍ਰਵਾਨਗੀ ਲਵੇਗਾ। ਇੱਥੋਂ ‘ਯੈੱਸ’ ’ਤੇ ਟੱਚ ਕਰ ਦਿਓ। ਬਲੂ-ਟੁੱਥ ‘ਆਨ’ ਹੋਣ ਉਪਰੰਤ ਬਲੂ-ਟੁੱਥ ਦੀ ਰੇਂਜ ’ਚ ਆਉਂਦੇ ਫੋਨਾਂ ਦੇ ਨਾਂ ਨਜ਼ਰ ਆਉਣਗੇ। ਇੱਥੋਂ ਲੋੜੀਂਦੇ ਫੋਨ ਦੇ ਨਾਂ ਦੀ ਚੋਣ ਕਰੋ। ਪ੍ਰਕਿਰਿਆ ਪੂਰੀ ਕਰਨ ਲਈ ਢੁਕਵੇਂ ਵਿਕਲਪਾਂ ਦੀ ਚੋਣ ਕਰਦੇ ਜਾਓ।
ਈ-ਮੇਲ (ਯਾਹੂ ਜਾਂ ਜੀ-ਮੇਲ) ਰਾਹੀਂ ਭੇਜਣ ਲਈ ਢੁਕਵਾਂ ਵਿਕਲਪ ਚੁਣੋ। ਚੁਣੀ ਗਈ ਐਪ ਮੇਲ ਸੰਦੇਸ਼ ਨਾਲ ਨੱਥੀ (ਅਟੈਚ) ਹੋ ਜਾਵੇਗੀ ਹੁਣ ਦੂਜੇ ਫੋਨ ’ਤੇ ਈ-ਮੇਲ ਪ੍ਰੋਗਰਾਮ ਖੋਲ੍ਹੋ ਅਤੇ ਭੇਜੀ ਗਈ ਐਪ ਡਾਊਨਲੋਡ ਕਰ ਲਓ।
ਐਪ ਨੂੰ ਐੱਸਡੀ ਕਾਰਡ ਵਿੱਚ ਸੇਵ ਕਰਨਾ
ਐਪ ਨੂੰ ਆਪਣੇ ਮੋਬਾਈਲ ਦੇ ਅੰਦਰੂਨੀ ਐੱਸਡੀ ਕਾਰਡ ਵਿੱਚ ਸੇਵ ਕਰਨ ਲਈ ਹੇਠਾਂ ਦਿੱਤੇ ਪੜ੍ਹਾਅ ਵਰਤੋ:
* ਏਪੀਕੇ ਐਕਸਟ੍ਰੈਕਟਰ ਪ੍ਰੋਗਰਾਮ ਚਾਲੂ ਕਰੋ।
* ਐਪਸ ਦੀ ਸੂਚੀ ਵਿੱਚੋਂ ਲੋੜੀਂਦੀ ਐਪ ਨੂੰ ਲੰਮੇ ਸਮੇਂ ਲਈ ਟੱਚ ਕਰਕੇ ਰੱਖੋ।
* ਐਕਸਟ੍ਰੈਕਟ ਏਪੀਕੇ (Extract APK) ਦੀ ਚੋਣ ਕਰੋ।
* ਐਪ ਅੰਦਰੂਨੀ ਐੱਸਡੀ ਕਾਰਡ ਐਪ ਮੈਨੇਜਰ ਵਾਲੇ ਫੋਲਡਰ ਵਿੱਚ ਸੇਵ ਹੋ ਜਾਵੇਗੀ।
ਇਸ ਤਰ੍ਹਾਂ ਐਪਸ ਨੂੰ ਯੂਐੱਸਬੀ ਡਾਟਾ ਕੇਬਲ ਰਾਹੀਂ ਕੰਪਿਊਟਰ ਵਿੱਚ ਭੇਜ ਕੇ ਸੁਰੱਖਿਅਤ ਕੀਤਾ ਜਾ ਸਕਦਾ ਹੈ।

No comments :

Post a Comment

Note: Only a member of this blog may post a comment.

ਇਸ ਵਰ੍ਹੇ ਦੇ ਨਵੇਂ ਸਾਫਟਵੇਅਰਾਂ ਦੀ ਕਹਾਣੀ, ਤਸਵੀਰਾਂ ਦੀ ਜ਼ੁਬਾਨੀ (20150107)


ਪੰਜਾਬੀ ਪੀਡੀਆ: ਪੰਜਾਬੀ ਦਾ ਆਨ-ਲਾਈਨ ਵਿਸ਼ਵਕੋਸ਼ ਜਿਸ 'ਤੇ ਹੁਣ ਤੱਕ ਡੇਢ ਲੱਖ ਤੋਂ ਵੱਧ ਇੰਦਰਾਜ ਉਪਲਬਧ ਹਨ (ਪ੍ਰਾਪਤੀ ਸਰੋਤ: www.punjabipedia.org)

ਪੰਜਾਬੀ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਡਾ. ਜਸਪਾਲ ਸਿੰਘ ਵੱਲੋਂ ਪੰਜਾਬੀ ਕੰਪਿਊਟਰ ਸਹਾਇਤਾ ਕੇਂਦਰ ਵੱਲੋਂ ਤਿਆਰ ਕੀਤੀ ਪੰਜਾਬੀ ਦੇ 20 ਸਾਫਟਵੇਅਰਾਂ ਦੀ ਸੀਡੀ ਅਤੇ 6 ਰੰਗਦਾਰ ਪੋਸਟਰਾਂ ਦਾ ਲੋਕ ਅਰਪਣ (ਪ੍ਰਾਪਤੀ ਸਰੋਤ: www.punjabicomputer.com)

ਪੰਜਾਬੀ ਯੂਨੀਵਰਸਿਟੀ ਦੇ ਪੰਜਾਬੀ ਭਾਸ਼ਾ ਸਾਹਿਤ ਅਤੇ ਸਭਿਆਚਾਰ ਦੇ ਤਕਨੀਕੀ ਵਿਕਾਸ ਦਾ ਉੱਚਤਮ ਕੇਂਦਰ ਵੱਲੋਂ ਤਿਆਰ ਯੂਨੀਕੋਡ ਫੌਂਟ ਪਲਟਾਊ ਅਤੇ ਪੰਜਾਬੀ ਸਪੈੱਲ ਚੈੱਕਰ (ਸੋਧਕ) ਦਾ ਆਨ-ਲਾਈਨ ਸੰਸਕਰਨ (ਪ੍ਰਾਪਤੀ ਸਰੋਤ: www.learnpunjabi.org)

ਯੂਨੀਕੋਡ ਅਤੇ ਸਤਲੁਜ ਦਾ ਕੀ-ਬੋਰਡ ਡਰਾਈਵਰ: ਜੀ-ਲਿਪੀਕਾ (ਪ੍ਰਾਪਤੀ ਸਰੋਤ: www.gurmukhifontconverter.com)

ਪੰਜਾਬੀ ਦੇ ਪ੍ਰਚਲਿਤ ਫੋਨੈਟਿਕ, ਰਮਿੰਗਟਨ ਅਤੇ ਇਨਸਕਰਿਪਟ ਕੀ-ਬੋਰਡ 'ਤੇ ਆਧਾਰਿਤ ਯੂਨੀਕੋਡ (ਰਾਵੀ) ਟਾਈਪਿੰਗ ਸੁਵਿਧਾ: ਯੂਨੀ-ਟਾਈਪ (ਪ੍ਰਾਪਤੀ ਸਰੋਤ: www.punjabicomputer.com)

ਪੰਜਾਬੀ ਦੇ ਕਿਸੇ ਅਗਿਆਤ ਫੌਂਟ 'ਚ ਤਿਆਰ ਪਾਠ ਦੇ ਫੌਂਟ ਦੀ ਪਛਾਣ ਕਰਨ ਅਤੇ ਉਸ ਦਾ ਫੌਂਟ ਕਨਵਰਟ ਕਰਨ ਵਾਲਾ ਸ਼ਕਤੀਸ਼ਾਲੀ ਫੌਂਟ ਕਨਵਰਟਰ ਪ੍ਰੋਗਰਾਮ (ਪ੍ਰਾਪਤੀ ਸਰੋਤ: www.advancedcentrepunjabi.com)

ਪੰਜਾਬੀ ਯੂਨੀਵਰਸਿਟੀ ਦੇ ਕੰਪਿਊਟਰ ਵਿਭਾਗ ਦੇ ਡਾ. ਧਰਮਵੀਰ ਸ਼ਰਮਾ ਵੱਲੋਂ ਪੰਜਾਬੀ ਕੋਸ਼, ਸਮ-ਅਰਥੀ ਕੋਸ਼ ਅਤੇ ਸਪੈੱਲ ਚੈੱਕਰ ਆਧਾਰਿਤ ਵਰਡ-ਪਲੱਗ-ਇਨ ਪ੍ਰੋਗਰਾਮ (ਪ੍ਰਾਪਤੀ ਸਰੋਤ: www.dveer.in)

ਆਨ-ਲਾਈਨ ਮੈਗਜ਼ੀਨ, ਕੀ-ਬੋਰਡ ਡਰਾਈਵਰ, ਇਜ਼ੀ ਟਾਈਪਿੰਗ ਟਿਊਟਰ, ਫੌਂਟ ਕਨਵਰਟਰ ਆਦਿ ਸਾਫ਼ਟਵੇਅਰ ਪ੍ਰਦਾਨ ਕਰਵਾਉਣ ਵਾਲੀ ਵੈੱਬਸਾਈਟ: ਸਕੇਪ ਪੰਜਾਬ (ਪ੍ਰਾਪਤੀ ਸਰੋਤ: www.scapepunjab.com)



No comments :

Post a Comment

Note: Only a member of this blog may post a comment.

ਡਾਟਾ ਦਾ ਬੈਕਅੱਪ ਲੈਣਾ (20150102)

ਅੰਗਰੇਜ਼ੀ ਦੇ ਸ਼ਬਦ ਬੈਕਅੱਪ (Backup) ਦਾ ਅਰਥ ਹੈ- ਪਿੱਛੇ ਹਟਣਾ ਜਾਂ ਸਮਰਥਨ ਦੇਣਾ ਹੈ। ਕੰਪਿਊਟਰ ਦੇ ਖ਼ਰਾਬ ਹੋਣ ਉਪਰੰਤ ਉਸ ਨੂੰ ਵਾਪਸ ਪਹਿਲਾਂ ਵਰਗਾ ਬਣਾਉਣ ਲਈ ‘ਬੈਕਅੱਪ’ ਸ਼ਬਦ ਵਰਤਿਆ ਜਾਂਦਾ ਹੈ। ਮੋਬਾਈਲ ਫੋਨ ਵਿੱਚ ਪਹਿਲਾਂ ਡਾਟਾ ਦਾ ਬੈਕਅੱਪ ਲੈ ਲਿਆ ਜਾਂਦਾ ਹੈ। ਭਵਿੱਖ ਵਿੱਚ ਮੋਬਾਈਲ ਵਿੱਚ ਕੋਈ ਸਮੱਸਿਆ ਆਉਣ ਜਾਂ ਗੁੰਮ ਹੋਣ ਦੀ ਸਥਿਤੀ ਵਿੱਚ ਉਹੀ ਡਾਟਾ ਨਵੇਂ ਮੋਬਾਈਲ ਵਿੱਚ ਰੀਸਟੋਰ ਕਰਕੇ ਪਹਿਲਾਂ ਵਾਲੀ ਸਥਿਤੀ ’ਤੇ ਜਾਇਆ ਜਾ ਸਕਦਾ ਹੈ।
ਮੋਬਾਈਲ ਫੋਨ ਦੀ ਚੋਰੀ, ਗੁੰਮ ਜਾਂ ਖ਼ਰਾਬ ਹੋਣ ਦੀ ਸਥਿਤੀ ਵਿੱਚ ਮੋਬਾਈਲ  ਦੇ ਨਾਲ-ਨਾਲ ਸੰਪਰਕ ਨੰਬਰ, ਐੱਸ.ਐੱਮ.ਐੱਸ., ਫੋਟੋਆਂ ਅਤੇ ਵੀਡੀਓ ਆਦਿ ਦਾ ਵੀ ਨੁਕਸਾਨ ਹੋ ਜਾਂਦਾ ਹੈ। ਐਂਡਰਾਇਡ ਫੋਨਾਂ ਵਿੱਚ ਡਾਟਾ ਨੂੰ ਮੁੜ ਪ੍ਰਾਪਤ ਕਰਨ ਲਈ ਗੂਗਲ ਨੇ ਪਹਿਲਾਂ ਹੀ ਇੰਤਜ਼ਾਮ ਕੀਤਾ ਹੋਇਆ ਹੈ।
ਮੋਬਾਈਲ ਵਿੱਚ ਡਾਟਾ ਦਾ ਬੈਕਅੱਪ ਲੈਣ ਦੇ ਕਈ ਤਰੀਕੇ ਹਨ। ਇੱਥੇ ਪੰਜ ਪ੍ਰਮੁੱਖ ਤਰੀਕਿਆਂ ਬਾਰੇ ਜਾਣਕਾਰੀ ਦਿੱਤੀ ਜਾਂਦੀ ਹੈ:
* ਡਰੈਗ ਅਤੇ ਡਰੌਪ (Drag and Drop)
ਇਹ ਡਾਟਾ ਨੂੰ ਸਾਂਭਣ ਦਾ ਰਵਾਇਤੀ ਤਰੀਕਾ ਹੈ। ਮੋਬਾਈਲ ਜਾਂ ਐੱਸਡੀ ਕਾਰਡ ਵਿਚਲੇ ਡਾਟਾ ਦਾ ਬੈਕਅੱਪ ਆਪਣੇ ਪੀਸੀ ਵਿੱਚ ਲੈਣ ਲਈ ਯੂਐੱਸਬੀ ਕੇਬਲ ਦੀ ਲੋੜ ਪੈਂਦੀ ਹੈ।
ਯੂਐੱਸਬੀ ਕੇਬਲ ਨਾਲ ਕੰਪਿਊਟਰ ਦਾ ਕੁਨੈਕਸ਼ਨ ਜੋੜ ਕੇ ਮੋਬਾਈਲ ਦੇ ਮੈਮਰੀ ਕਾਰਡ ਨੂੰ ਵਿੰਡੋਜ਼ ਐਕਸਪਲੋਰਰ ’ਚ ਖੋਲ੍ਹਿਆ ਜਾਂਦਾ ਹੈ। ਇੱਥੋਂ ਡਰੈਗ ਅਤੇ ਡਰੌਪ ਜਾਂ ਕਾਪੀ-ਪੇਸਟ ਰਾਹੀਂ ਡਾਟਾ ਨੂੰ ਕੰਪਿਊਟਰ ਦੀ ਹਾਰਡ ਡਿਸਕ ਵਿੱਚ ਸਾਂਭਿਆ ਜਾ ਸਕਦਾ ਹੈ।
* ਬੈਕਅੱਪ ਐਂਡ ਰੀਸਟੋਰ
ਬੈਕਅੱਪ ਐਂਡ ਰੀਸਟੋਰ ਗੂਗਲ ਦੀ ਚੰਗੀ ਸਹੂਲਤ ਹੈ। ਇਸ ਰਾਹੀਂ ਮੋਬਾਈਲ ਦੇ ਡਾਟਾ ਨੂੰ ‘ਬੈਕਅੱਪ’ ਰਾਹੀਂ ਗੂਗਲ ਕਲਾਊਡ ’ਤੇ ਚੜ੍ਹਾਇਆ ਜਾਂਦਾ ਹੈ। ਇਸ ਕਾਰਜ ਲਈ ਮੋਬਾਈਲ ’ਤੇ ਇੰਟਰਨੈੱਟ ਦੀ ਸੁਵਿਧਾ ਹੋਣਾ ਅਤੇ ਗੂਗਲ/ਜੀ-ਮੇਲ ’ਤੇ ਖਾਤਾ ਹੋਣਾ ਬਹੁਤ ਜ਼ਰੂਰੀ ਹੈ।
ਕਲਾਊਡ ਇੱਕ ਇੰਟਰਨੈੱਟ ਆਧਾਰਿਤ ਸੁਵਿਧਾ ਹੈ ਜਿਸ ਤਹਿਤ ਅਸੀਂ ਆਪਣੇ ਡਾਟਾ ਨੂੰ ਇੰਟਰਨੈੱਟ ’ਤੇ ਚੜ੍ਹਾ (ਬੈਕਅੱਪ ਲੈ) ਸਕਦੇ ਹਾਂ ਤੇ ਫਿਰ ਲੋੜ ਪੈਣ ’ਤੇ ਵਾਪਸ ਉਤਾਰ (ਰੀਸਟੋਰ ਕਰ) ਸਕਦੇ ਹਾਂ।
ਬੈਕਅੱਪ ਲੈਣ ਦੇ ਪੜ੍ਹਾਅ ਹੇਠਾਂ ਲਿਖੇ ਅਨੁਸਾਰ ਹਨ:
* ਮੋਬਾਈਲ  ਦੀ ‘ਸੈਟਿੰਗਜ਼’ ’ਚ ਜਾਓ।
* ‘ਬੈਕਅੱਪ ਐਂਡ ਰੀਸਟੋਰ’ ਨੂੰ ਚੁਣੋ।
* ‘ਬੈਕਅੱਪ ਮਾਈ ਡਾਟਾ’ ਅਤੇ ‘ਆਟੋਮੈਟਿਕ ਰੀਸਟੋਰ’ ਦੇ ਸਾਹਮਣੇ ਨਜ਼ਰ ਆਉਣ ਵਾਲੇ ਚੈੱਕ ਬਕਸਿਆਂ ਨੂੰ ਟੱਚ ਕਰਕੇ ਚੁਣੋ।
* ਗੂਗਲ ’ਚ ਖਾਤਾ ਨਾ ਹੋਣ ਦੀ ਸੂਰਤ ਵਿੱਚ ਤੁਹਾਨੂੰ ਹੇਠਲੇ ਪਾਸੇ ‘ਐਡ ਅਕਾਊਂਟ’ ਦਾ ਵਿਕਲਪ ਨਜ਼ਰ ਆਵੇਗਾ। ਇੱਥੋਂ ਪਹਿਲਾਂ ਤੋਂ ਬਣੇ ਖਾਤੇ ਦਾ ਇਸਤੇਮਾਲ ਕਰਨ ਲਈ ‘ਐਗਜ਼ਿਸਟਿੰਗ’ ਅਤੇ ਨਵਾਂ ਬਣਾਉਣ ਲਈ ‘ਨਿਊ’ ਦੀ ਚੋਣ ਕਰਕੇ ਢੁਕਵੇਂ ਵਿਕਲਪਾਂ ਦਾ ਪਾਲਣਾ ਕਰੋ।
* ਨਵੇਂ ਫੋਨ ’ਚ ‘ਬੈਕਅੱਪ ਐਂਡ ਰੀਸਟੋਰ’ ’ਤੇ ਜਾ ਕੇ, ਫਿਰ ‘ਰੀਸਟੋਰ’ ਦੀ ਚੋਣ ਕਰਕੇ ਪੁਰਾਣੇ ਡਾਟਾ ਦੀ ਪੁਰਨ-ਸਥਾਪਨਾ ਕੀਤੀ ਜਾ ਸਕਦੀ ਹੈ।
* ਸਮਕਾਲੀਕਰਨ ਜਾਂ ਸਿਨਕ੍ਰੋਨਾਇਜ਼ੇਸ਼ਨ।
ਜਦੋਂ ਕਈ ਚੀਜ਼ਾਂ ਇੱਕੋ ਸਮੇਂ ਵਾਪਰਦੀਆਂ ਹਨ ਤਾਂ ਉਨ੍ਹਾਂ ਨੂੰ ਸਮਕਾਲੀਕਰਨ ਜਾਂ ਸਿਨਕ੍ਰੋਨਾਇਜ਼ੇਸ਼ਨ ਕਿਹਾ ਜਾਂਦਾ ਹੈ। ਐਂਡਰਾਇਡ ਫੋਨ ਦੇ ਡਾਟਾ ਨੂੰ ਗੂਗਲ ਕਲਾਊਡ (ਆਨ-ਲਾਈਨ) ’ਤੇ ਸਾਂਭਿਆ ਜਾ ਸਕਦਾ ਹੈ। ਮੋਬਾਈਲ ਫੋਨ ਦੇ ਡਾਟਾ ਜਿਵੇਂ ਕਿ ਸੰਪਰਕ ਸੂਚੀ, ਐੱਸਐੱਮਐੱਸ ਵਿੱਚ ਕੀਤਾ ਪਰਿਵਰਤਨ ਕਲਾਊਡ ਸਟੋਰ ’ਤੇ ਉਸੇ ਸਮੇਂ ਆਪਣੇ-ਆਪ ਪ੍ਰਭਾਵੀ ਹੋ ਜਾਂਦਾ ਹੈ ਇਸ ਨੂੰ ਸਮਕਾਲੀਕਰਨ ਜਾਂ ਸਿਨਕ੍ਰੋਨਾਇਜ਼ੇਸ਼ਨ ਕਿਹਾ ਜਾਂਦਾ ਹੈ। ਇਸ ਸੁਵਿਧਾ ਦਾ ਲਾਭ ਲੈਣ ਲਈ ਗੂਗਲ ’ਤੇ ਖਾਤਾ ਹੋਣਾ ਬਹੁਤ ਜ਼ਰੂਰੀ ਹੈ। ਆਓ ਇਸ ਪ੍ਰਕਿਰਿਆ ਨੂੰ ਪਗ-ਦਰ-ਪਗ ਕਰਨ ਦਾ ਅਭਿਆਸ ਕਰੀਏ:
* ਮੋਬਾਈਲ  ਫੋਨ ਦੀ ‘ਸੈਟਿੰਗਜ਼’ ਖੋਲ੍ਹੋ।
* ‘ਅਕਾਊਂਟ’ ਵਾਲੇ ਹਿੱਸੇ ’ਚ ‘ਗੂਗਲ’ ਨੂੰ ਚੁਣੋ।
* ਹੁਣ ‘ਸਿੰਕ’ (Sync) ’ਤੇ ਟੱਚ ਕਰੋ।
ਹੇਠਾਂ ਲਿਖਿਆਂ ’ਤੇ ਵਾਰੀ-ਵਾਰੀ ਟੱਚ ਕਰਕੇ ਸਮਕਾਲੀਕਰਨ ਦੀ ਪ੍ਰਕਿਰਿਆ ਪੂਰੀ ਕਰੋ:
* ਐਪ ਡਾਟਾ
* ਕਲੰਡਰ
* ਕੰਟੈਕਟਸ (ਸੰਪਰਕ)
* ਜੀ-ਮੇਲ
* ਗੂਗਲ ਫ਼ੋਟੋ ਆਟੋ ਬੈਕ-ਅਪ
* ਗੂਗਲ ਪਲੱਸ ਆਦਿ
ਗੂਗਲ ਪਲੱਸ
ਗੂਗਲ ਪਲੱਸ (ਗੂਗਲ +) ਗੂਗਲ ਦੀ ਇੱਕ ਸੋਸ਼ਲ ਨੈੱਟਵਰਕਿੰਗ ਸਹੂਲਤ ਹੈ। ਇਹ ਸੇਵਾ ਗੂਗਲ ਦੀਆਂ ਹੋਰਨਾਂ ਸੇਵਾਵਾਂ ਜਿਵੇਂ ਕਿ ਜੀ-ਮੇਲ ਅਤੇ ਯੂ-ਟਿਊਬ ਆਦਿ ਨਾਲ ਜੁੜੀ ਹੋਈ ਹੈ।
ਐਂਡਰਾਇਡ ਵਰਤੋਂਕਾਰਾਂ ਦੁਆਰਾ ਗੂਗਲ ਪਲੱਸ ਦੀ ਵਰਤੋਂ ਆਮ ਤੌਰ ’ਤੇ ਫੋਟੋਆਂ ਦਾ ਬੈਕਅੱਪ ਲੈਣ ਲਈ ਕੀਤੀ ਜਾਂਦੀ ਹੈ।
* ਤੀਜੀ ਧਿਰ ਦੇ ਸਾਫਟਵੇਅਰ
ਬੈਕਅੱਪ ਅਤੇ ਰੀਸਟੋਰ ਲਈ ਗੂਗਲ ਤੋਂ ਇਲਾਵਾ ਤੀਜੀ ਧਿਰ (Third Party) ਦੇ ਸਾਫਟਵੇਅਰ ਵੀ ਉਪਲਬਧ ਹਨ ਜਿਨ੍ਹਾਂ ਵਿੱਚੋਂ ਫੋਟੋ ਬਕਟ ਮੋਬਾਈਲ (Photo bucket mobile), ਸੁਪਰ ਬੈਕਅੱਪ (Super Backup), ਫਲਿੱਕਰ (Flicker,  ਮਾਈਕ੍ਰੋਸਾਫਟ ਸਕਾਈ ਡਰਾਈਵ (Skydrive), ਡਰਾਪ-ਬਾਕਸ (Dropbox) ਆਦਿ ਪ੍ਰਮੁੱਖ ਹਨ।

No comments :

Post a Comment

Note: Only a member of this blog may post a comment.

ਗੁਰਬਾਣੀ ਐਪ: ਧੁਰ ਕੀ ਬਾਣੀ (20141126)

ਇਹ ਐਂਡਰਾਇਡ ਫੋਨ ਲਈ ਤਿਆਰ ਕੀਤਾ ਇੱਕ ਗੁਰਬਾਣੀ ਸਰਚ ਇੰਜਣ ਹੈ। ਗੂਗਲ ਐਪ ਸਟੋਰ ‘ਤੇ Dhur Ki Bani ਟਾਈਪ ਕਰਕੇ ਇਸ ਨੂੰ ਮੁਫ਼ਤ ਵਿੱਚ ਡਾਊਨਲੋਡ ਕੀਤਾ ਜਾ ਸਕਦਾ ਹੈ।
ਇਸ ਐਪ ਵਿੱਚ ਕਈ ਵਿਸ਼ੇਸ਼ਤਾਵਾਂ ਸ਼ਾਮਲ ਹਨ। ਮੁੱਖ ਰੂਪ ਵਿੱਚ ਇਨ੍ਹਾਂ ਨੂੰ ਤਿੰਨ ਸ਼੍ਰੇਣੀਆਂ ਸਿੱਖ ਪ੍ਰੇਅਰਜ਼, ਸਰਚ ਬਾਏ ਅੰਗ, ਸਰਚ ਬਾਏ ਸ਼ਬਦ ਵਿੱਚ ਵੰਡਿਆ ਹੋਇਆ ਹੈ। ‘ਸਿੱਖ ਪ੍ਰੇਅਰਜ਼’ ਵਿੱਚ ਜਪਜੀ ਸਾਹਿਬ, ਜਾਪ ਸਾਹਿਬ ਤਵ ਪ੍ਰਸਾਦਿ ਸਵੱਯੇ, ਚੌਪਾਈ ਸਾਹਿਬ, ਅਨੰਦ ਸਾਹਿਬ, ਰਹਿਰਾਸ ਸਾਹਿਬ ਅਤੇ ਸੋਹਲਾ ਸਾਹਿਬ ਸ਼ਾਮਲ ਹਨ।
‘ਸਰਚ ਬਾਏ ਅੰਗ’ ਉੱਤੇ ਟੱਚ ਕਰਕੇ ਵਰਤੋਂਕਾਰ ਅੰਗ (ਪੰਨਾ ਨੰਬਰ) ਦੇ ਆਧਾਰ ‘ਤੇ ਸਰਚ ਕਰ ਸਕਦਾ ਹੈ। ਮਿਸਾਲ ਵਜੋਂ ਜੇ ਕੋਈ ਇਹ ਵੇਖਣਾ ਚਾਹੇ ਕਿ ਗੁਰਬਾਣੀ ਦੇ ਪੰਨਾ ਨੰਬਰ 16 ‘ਤੇ ਕੀ ਦਰਜ ਹੈ ਤਾਂ ਉਹ ਸਰਚ ਬਕਸੇ ਵਿੱਚ ਪੰਨਾ ਨੰਬਰ ਟਾਈਪ ਕਰਕੇ ਸਰਚ ਕਰ ਸਕਦਾ ਹੈ।
‘ਸਰਚ ਬਾਏ ਸ਼ਬਦ’ ਸੁਵਿਧਾ ਰਾਹੀਂ ਬਾਣੀ ਵਿਚਲੀ ਪੰਕਤੀ ਦੇ ਹਰੇਕ ਸ਼ਬਦ ਦਾ ਪਹਿਲਾ ਅੱਖਰ ਅੰਗਰੇਜ਼ੀ (ਰੋਮਨ) ਵਿੱਚ ਲਿਖ ਕੇ ਖੋਜ ਕੀਤੀ ਜਾ ਸਕਦੀ ਹੈ। ਮਿਸਾਲ ਵਜੋਂ ‘ਸਚੋ ਸਚਾ ਆਖੀਐ ਸਚੇ ਸਚਾ ਥਾਨੁ’ ਦੇ ਸਹੀ ਸ਼ਬਦ ਜੋੜ, ਪੰਨਾ ਨੰਬਰ ਅਤੇ ਇਸ ਦਾ ਅੰਗਰੇਜ਼ੀ ਅਨੁਵਾਦ ਪੜ੍ਹਨਾ ਚਾਹੁੰਦੇ ਹੋ ਤਾਂ ਤੁਸੀਂ ਟਾਈਪ ਕਰੋਗੇ- ‘s s a s s t’। ਇਸ ਉਪਰੰਤ ਗੁਰਮੁਖੀ ਵਿੱਚ ਲਿਖੀ ਪੂਰੀ ਪੰਕਤੀ ਨਜ਼ਰ ਆ ਜਾਵੇਗੀ। ਇਸ ਉੱਤੇ ਟੱਚ ਕਰਕੇ ਤੁਸੀਂ ਸਿੱਧਾ ਉਸ ਦੇ ਪੰਨਾ ਨੰਬਰ ‘ਤੇ ਜਾ ਕੇ ਇਸ ਦਾ ਅਰਥ ਜਾਣ ਸਕਦੇ ਹੋ। ਜੇ ਤੁਸੀਂ ਅੰਗਰੇਜ਼ੀ ਵਿੱਚ ਟਾਈਪ ਕੀਤੇ ਅੱਖਰਾਂ ਨੂੰ ਪੰਕਤੀ ਦੇ ਵਿਚਕਾਰ ਵੀ ਲੱਭਣਾ ਚਾਹੁੰਦੇ ਹੋ ਤਾਂ ਸਰਚ ਬਕਸੇ ਤੋਂ ਹੇਠਾਂ ਦੂਜੇ ਨੰਬਰ ਵਾਲਾ ਵਿਕਲਪ ‘ਲੈਟਰਜ਼ ਫਰੋਮ ਐਨੀਵੇਅਰ’ ਲੈ ਲਓ। ਧਿਆਨ ਰਹੇ ਕਿ ਅੰਗਰੇਜ਼ੀ ਦੇ ਅੱਖਰਾਂ ਵਿੱਚਕਾਰ ਵਿੱਥ (ਸਪੇਸ) ਜ਼ਰੂਰ ਹੋਵੇ।
ਐਪ ਦੇ ਨਵੇਂ 4.0 ਸੰਸਕਰਨ ਵਿੱਚ ਕੁਝ ਨਵੀਆਂ ਵਿਸ਼ੇਸ਼ਤਾਵਾਂ ਜੋੜੀਆਂ ਗਈਆਂ ਹਨ। ਇਸ ਵਿੱਚ ਗੁਰਬਾਣੀ ਦੀਆਂ ਤੁਕਾਂ ਦਾ ਅਨੁਵਾਦ ਜਾਂ ਲਿਪੀਅੰਤਰਨ ਦਿਖਾਉਣ ਦੀ ਵਿਵਸਥਾ ਕੀਤੀ ਗਈ ਹੈ। ਫੌਂਟ ਦਾ ਆਕਾਰ ਬਦਲਣ ਅਤੇ ਬੁੱਕਮਾਰਕ ਲਗਾਉਣ ਦੀ ਸੁਵਿਧਾ ਵੀ ਜੋੜੀ ਗਈ ਹੈ। ਇਸੇ ਤਰ੍ਹਾਂ ‘ਸਿੱਖ ਪ੍ਰੇਅਰਜ਼’ ਵਿੱਚ ‘ਅਰਦਾਸ’ ਨੂੰ ਸ਼ਾਮਲ ਕੀਤਾ ਗਿਆ ਹੈ।

No comments :

Post a Comment

Note: Only a member of this blog may post a comment.

Popular Posts

ਹੁਣੇ-ਹੁਣੇ ਪੋਸਟ ਹੋਈ

ਬਲਿਊ ਵੇਲ ਦੀ ਖੂਨੀ ਖੇਡ/blue-whale-fmPatiala-part-2